لاہور(نیشنل ٹائمز)لاہور میں کورونا کے مختلف ویرینٹس، انفلوئنزا اور فلو وائرس سے شہری متاثر ہونے لگے ہیں ، بخار، کھانسی، نزلہ، گلے اور جسم میں درد کی شکایات میں اضافہ دیکھنے میں آ رہا ہے ،ڈین انسٹی ٹیوٹ آف پبلک ہیلتھ پروفیسر سائرہ افضل کا کہنا ہے کہ کورونا اور فلو کی علامات میں مماثلت ہے اور صرف علامات کی بنیاد پر حتمی تشخیص مشکل ہے ،فلو کے مریضوں میں کورونا کی تشخیص کے لیے ریپڈ ٹیسٹنگ کی جا رہی ہے جس میں کورونا کے مثبت کیسز بھی سامنے آ رہے ہیں، انہوں نے کہا کہ کورونا کے مختلف ویرینٹس پہلے کے مقابلے میں کم شدت والے ہو سکتے ہیں، تاہم علامات کو نظر انداز نہ کیا جائے ،کورونا اور فلو دونوں سانس کی بیماریوں کی علامات پیدا کر سکتے ہیں، اس لیے فلو کی علامات ظاہر ہونے پر شہری خود تشخیص کے بجائے ڈاکٹر سے رجوع کریں،طبی ماہرین کا کہنا ہے کہ فلو سے بچاؤ کے لیے موسمی انفلوئنزا ویکسین لگوانی چاہیے جو بیماری کی شدت اور پیچیدگیوں کے خطرے کو کم کرنے میں مددگار ہے ۔ بزرگ، حاملہ خواتین اور دائمی بیماریوں کے شکار افراد فلو اور کورونا سے خصوصی احتیاط کریں،ماہرین نے ہدایت کی ہے کہ کورونا اور فلو سے بچاؤ کے لیے رش والی جگہوں پر احتیاط برتی جائے ، ہاتھوں کی صفائی کا خیال رکھا جائے اور بیمار ہونے کی صورت میں فاصلہ رکھا جائے ۔ طبی ماہرین کے مطابق کورونا ویکسین اور موسمی فلو ویکسین ایک ہی دن بھی لگائی جا سکتی ہیں۔