بیجنگ (شِنہوا) چین کے انسان بردار خلائی ادارے نے ہفتے کے روز اعلان کیا ہے کہ ایک پاکستانی خلا باز شین ژو-24 انسان بردار خلائی مشن کے عملے میں پے لوڈ سپیشلسٹ کے طور پر شامل ہوگا۔
مختصر مدت کی خلائی پرواز مکمل کرنے کے بعد پاکستانی خلا باز شین ژو-23 خلائی جہاز کے ذریعے زمین پر واپس آئے گا۔
چین کے خلائی سٹیشن پر پہلے غیر ملکی مہمان کی آمد کے ساتھ یہ مشن ملک کے انسان بردار خلائی پروگرام کی تاریخ میں چینی اور غیر ملکی خلا بازوں کی مشترکہ خلائی پرواز کا پہلا موقع ہوگا۔
فروری 2025 میں چین اور پاکستان نے اسلام آباد میں خلا بازوں کے انتخاب، تربیت اور چینی خلائی سٹیشن کے مشنز میں شرکت سے متعلق تعاون کے ایک معاہدے پر دستخط کئے تھے جس کے بعد پاکستان سے خلا بازوں کے انتخاب کا عمل باضابطہ طور پر شروع کیا گیا۔
انتخاب اور جانچ پڑتال کے 3 سخت مراحل مکمل ہونے کے بعد پاکستان کے 2 متبادل خلا بازوں کا انتخاب کیا گیا۔ چین میں تمام تربیتی مراحل مکمل کرنے اور جائزے میں کامیابی حاصل کرنے کے بعد ان میں سے ایک خلا باز انسان بردار خلائی مشن میں حصہ لے گا جبکہ دوسرا بطور متبادل خلا باز خدمات انجام دے گا۔