کینبرا (شِنہوا) جنوبی آسٹریلیا کے وزیر برائے ریاستی ترقی کرس پکٹن نے کہا ہے کہ چین کی بین الاقوامی درآمدای نمائش (سی آئی آئی ای) جنوبی آسٹریلیا کے برآمد کنندگان اور چینی خریداروں، تقسیم کاروں اور صنعتی شعبے سے وابستہ افراد کے درمیان روابط مضبوط بنانے کے لئے ایک اہم پلیٹ فارم ہے۔
شِنہوا کو حال ہی میں دیئے گئے ایک تحریری انٹرویو میں کرس پکٹن نے کہا کہ گزشتہ 5 برسوں کے دوران سی آئی آئی ای کے ذریعے قائم ہونے والے روابط نے متعدد اہم تجارتی معاہدوں کو حتمی شکل دینے میں مدد دی ہے۔ اس کے علاوہ چینی خریداروں، تقسیم کاروں اور صارفین میں جنوبی آسٹریلیا کی زرعی و غذائی مصنوعات اور برانڈز کے بارے میں آگاہی میں بھی اضافہ ہوا ہے۔
چینی منڈی کی اہمیت پر بات کرتے ہوئے پکٹن نے کہا کہ چین سرمایہ کاری کا ایک اہم ذریعہ ہے جو ریاست بھر میں معاشی ترقی، روزگار کے مواقع اور برآمدات کے فروغ میں معاونت فراہم کرتا ہے۔
تجارتی منڈی تک رسائی اور کاروباری ماحول کے حوالے سے پکٹن نے کاروباری سرگرمیوں میں سہولت فراہم کرنے اور منڈی تک رسائی بہتر بنانے کی کوششوں کا خیرمقدم کیا۔ ان کا کہنا تھا کہ ایسے اقدامات جنوبی آسٹریلیا کی کمپنیوں کو بدلتی ہوئی طلب کے مطابق اپنی حکمت عملی ترتیب دینے اور چینی منڈی میں اپنی موجودگی بڑھانے میں مدد دیں گے۔
پکٹن نے کہا کہ دوطرفہ تجارت اور سرمایہ کاری کے روابط کو مزید مضبوط بنانے کے لئے جنوبی آسٹریلیا نے چین میں اپنے نمائندہ دفاتر کا نیٹ ورک قائم کر رکھا ہے جس میں شنگھائی میں ریاستی ترقی کا دفتر اور جینان، گوانگ ژو اور ہانگ کانگ میں دفاتر شامل ہیں۔