بیجنگ(شِنہوا)چین کی وزارت تحفظ عامہ (ایم پی ایس)کے مطابق 30 اپریل تک بین السرحدی جوئے کے الزام میں مجموعی طور پر 914 مفروروں نے خود کو پولیس کے حوالے کر دیا ہے ، چینی عدلیہ اور قانون نافذ کرنیوالے اداروں کی جانب سے ایسے مجرموں کو رعایت کے حصول کیلئے رضاکارانہ بنیادوں پر خود کو پیش کرنے کیلئے 30 اپریل کی حتمی مہلت دی گئی تھی۔ایم پی ایس نے کہا کہ چینی مین لینڈ پر کل 493 مشتبہ افراد پولیس کے سامنے پیش ہوئے جبکہ مین لینڈ سے باہر 317 مشتبہ افراد نے خود کو پولیس کے حوالے کیا ہے۔ 104 دیگر افراد نے بھی خود کو پولیس کے حوالے کرنے کے خطوط جمع کرائے ہیں لیکن ابھی انہیں باضابطہ طور پر گرفتار نہیں کیا جا سکتا ہے کیونکہ وہ اب بھی بیرون ملک مقیم ہیں۔چین کی سپریم پیپلز کورٹ ، سپریم پیپلز پروکوریٹریٹ اور وزارت تحفظ عامہ نے 5 فروری کو مشترکہ طور پر ایک بیان جاری کیا تھا جس میں ایسے معاملات میں ملوث مشتبہ افراد سے خود کو پولیس کے حوالے کرنے کی تاکید کی گئی تھی۔بیان کے مطابق 30 اپریل سے قبل خود سے رجوع کرنے والے اور اپنے جرائم کا اعتراف کرنے والے ملزمان کو کم سزائیں دی جائیں گی ۔ مزید کہا گیا تھا کہ نسبتا معمولی سمجھے جانیوالے جرائم میں جرمانے کی چھوٹ بھی دی جا سکتی ہے۔