نیویارک (نیشنل ٹائمز) معروف امریکی ٹیکنالوجی کمپنی ایپل 3کھرب ڈالرز کی مارکیٹ ویلیو رکھنے والی دنیا کی پہلی کمپنی بن گئی۔غیر ملکی میڈیا رپورٹس کے مطابق ایپل کے شیئرز پیرکو مارکیٹ ٹریڈنگ میں تقریبا 3 فیصد بڑھ کر 182.88 ڈالرز تک پہنچے جس کے بعد ایپل دنیا میں عوامی طور پر تجارت کرنے والی پہلی کمپنی بن گئی جس کی مارکیٹ ویلیو 3 کھرب تک پہنچ گئی۔اطلاعات کے مطابق مارچ 2020 میں کورونا کے بعد سے ایپل کے شیئر کی قیمت 3 گنا سے زیادہ بڑھ گئی ہے، جس سے مارکیٹ کیپٹلائزیشن میں تقریبا 2 ٹریلین ڈالر کا اضافہ ہوا ہے۔اس کےعلاوہ ایپل کی قدر اب دنیا کی10بڑی معیشتوں میں سے برطانیہ، بھارت، فرانس، اٹلی، کینیڈا اور جنوبی کوریاکے گروس ڈومیسٹک پروڈکٹ سے زیادہ ہوگئی ہے۔واضح رہے کہ ایپل کی مارکیٹ ویلیو پہلی بار اگست 2018 میں ایک کھرب ڈالرز تک پہنچی تھی جبکہ اگست 2020 میں اس کمپنی کی مارکیٹ ویلیو دوکھرب ڈالرز سے تجاوز کر گئی تھی۔