اسلام آباد (نیشنل ٹائمز)شیخ رشید اور دوست محمد خان میں مقابلہ حسن کروایا جائے۔ تفصیلات کے مطابق وزیرِ مملکت علی محمد خان نے وفاقی وزیر داخلہ شیخ رشید اور دوست محمد خان میں مقابلہ حسن کروانے کا مشورہ دے ڈالا جس کے بعد سینیٹ ہال قہقہوں سے گونج اٹھا۔ میڈیا رپورٹس کے مطابق سینٹ اجلاس کے دوران اپوزیشن اور حکومتی بنچوں سے تعلق رکھنے والے اراکین سینیٹ نے وزیر داخلہ کے ایوان اور کمیٹیوں میں نہ آنے کے حوالے سے اپنی شکایات پیش کردیں جس پر چیئرمین سینیٹ نے وزیر داخلہ کو سینیٹ اجلاس میں آنے اور سوالوں کے جوابات دینے کی ہدایت کی ۔اجلاس کے دوران سینیٹر ہدایت اللہ نے کہاکہ وفاقی وزیر داخلہ شیخ رشید کی شکل بھول گئے ہیں کیونکہ وہ ایوان میں نہیں آتے ہیں، ٹی وی پر روز بیٹھے ہوتے ہیں یہاں آنے میں کیا مسئلہ ہے، حکومتی سینیٹر محسن عزیز نے کہاکہ وزیر داخلہ سینیٹ داخلہ کمیٹی میں بھی نہیں آتے ہیں انہیں ہدایت کی جائے کہ وہ ایوان سمیت داخلہ کمیٹی میں بھی حاضری دیں جس پر چیرمین سینیٹ نے کہاکہ وزیر داخلہ شیخ رشید کو چاہیے کہ وہ ایوان میں آئیں اور اپنا دیدار کرائیں، شیخ رشید پرانے پارلیمنٹرین ہیں اس کو ایوان کو ٹائم دینا چاہیے اور جواب دینا چاہیے تاکہ وزارت داخلہ کی کارکردگی بہتر ہوسکے۔اس پر وزیر مملکت علی محمد خان نے کہا کہ شیخ رشید کو ایوان میں ضرور آنا چاہیے اور یہاں اراکین کے ساتھ مقابلہ حسن کیا جائے جس پر اراکین مسکراتے رہے۔