اسلام آباد(نیشنل ٹائمز)پاکستان پیپلز پارٹی کی رہنما سینیٹر پلوشہ خان نے کہا ہے کہ چور دروازے سے لائے گئے سلیکٹڈ وزیراعظم رات کے اندھیرے میں عوام پر مہنگائی کے حملے کر رہے ہیں۔ ظالم اور نالائق وزیراعظم کو اقتدار سے نکالنے کے لئے چیئرمین پیپلزپارٹی بلاول بھٹو زرداری کی حکمت عملی ہی واحد راستہ ہے اور یہ وہ راستہ ہے کہ عمران خان کے خلاف عدم اعتماد کی تحریک لائی جائے۔ انہوں نے کہا کہ نالائق وزیراعظم عوام پر مہنگائی کی کارپٹ بمباری کر رہے ہیں۔ آٹا 80روپے کلو، چینی 160روپے کلو اور سبزیاں 100روپے کلو سے کم نہیں، دالیں 300روپے فی کلو بک رہی ہیں۔ انہوں نے کہا کہ پٹرول مہنگا ہونے سے موٹر سائیکل والے بھی پیدل ہو جائیں گے۔ پلوشہ خان نے کہا کہ مشیر خزانہ کہہ رہے ہیں کہ آئی ایم ایف سے بجلی کی قیمت بڑھانے کا معاہدہ ہو چکا ہے۔ پلوشہ خان نے کہا کہ جتنا جلد ہو سکے نالائق اور ظالم وزیراعظم کے خلاف عدم اعتماد کی تحریک لائی جائے۔