لاہور(نیشنل ٹائمز) وفاقی وزیر قانون بیرسٹر فروغ نسیم نے انکشاف کیا ہے کہ ہر ایک نے مجھے وزارت قانون سے دھکا دینے کی کوشش کی، میں خود بھی جانا چاہتا تھا لیکن وزیراعظم عمران خان نے جانے ہی نہیں دیا۔ انہوں نے وکلا کنونشن سے خطاب کرتے ہوئے کہا کہ میرا تعلق کسی اور جماعت سے ہے لیکن عمران خان نے کہا کہ وزیر قانون کے لیے آپ کپتان کی چوائس ہو۔وفاقی وزیر قانون بیرسٹر فروغ نسیم نے دعویٰ کیا کہ وزارت قانون میں میرٹ کی بالادستی ہے۔ ان کا کہنا تھا کہ ہم نے بڑے زبردست سول ریفارمز کیے ہیں، نئے قوانین بنائے ہیں۔انہوں نے واضح طور پر کہا کہ قوانین کی عمل داری ججز اور وکلا کرتے ہیں، میں نے سسٹم بنا دیا ہے، اب آپ کے ہاتھ میں ہے۔بیرسٹر فروغ نسیم نے کہا کہ 2018 میں جب آیا تو میں نے انصاف لائرز فورم سے متعلق نہیں سنا تھا۔ ان کا کہنا تھا کہ سب کے نام نہیں بتاؤں گا، سب کے کرتوت سب کو پتہ ہیں۔