اسلام آباد (نیشنل ٹائمز)دینی مدارس کا وجود دین کے لیے اور وفاق المدارس کا وجود دینی مدارسِ کے لیے ضروری ہے،مدارس کو حکومتی تحویل میں دے کر دین کو داو پر نہیں لگا سکتے،مدارس دینیہ کا اتحاد ویکجہتی ہماری قوت ہے دشمن اس قوت کو توڑ کر اپنے مقاصد کی تکمیل چاہتا ہے،مدارس کے نظام ونصاب اور حریت فکر وعمل کا ہرقیمت پر تحفظ کریں گے،وفاق المدارس مفتی تقی عثمانی کی قیادت میں مزید ترقی کرے گا۔


ان خیالات کا اظہار وفاق المدارس العربیہ پاکستان کے جنرل سیکرٹری مولانا محمد حنیف جالندھری نے ادارہ علوم اسلامی اسلام اباد،دارالعلوم تعلیم القرآن راولپنڈی اور دیگر مقامات پر اجتماعات سے خطاب کرتے ہوئے کیا انہوں نے کہا کہ دین کی بقاء کے لئے مدارس کا وجود اور مدارس کی حفاظت کے لیے وفاق المدارس العربیہ پاکستان کا وجود از حد ضروری ہے،انہوں نے کہا کہ آج تک جتنے دینی ادارے حکومتی تحویل میں گئے وہ سب برباد ہوگئے ہم دین کو داو پر نہیں لگا سکتے اس لیے مدارس کو حکومتی کنٹرول سے ہر قیمت پر آزاد رکھنا چاہتے ہیں،مدارس کے خلاف سازشوں کے نتیجے میں وفاق المدارس مزید مضبوط ہوا ہے اور ان شاءاللہ آئندہ حضرت مفتی تقی عثمانی کی قیادت میں وفاق المدارس مزید ترقی کرے گا،انہوں نے کہا کہ وفاق المدارس نے دینی مدارس کے نصاب،نظام،انتظامی ڈھانچے اور مالیاتی سسٹم کی حفاظت کی اور آئندہ بھی مدارس کا پہرہ دیں گے،ہم نے مدارس تک گرم وسرد ہوائیں نہیں ہہنچنے دیں اور آئندہ بھی مدارس بنانے،چلانے اور بچانے کے لیے اہل مدارس کا ہرممکن تعاون کریں گے- مولانا جالندھری نے کہا کہ اہل مدارس پریشان نہ ہوں ان کے معاملات مضبوط ہاتھوں میں ہیں-