اسلام آباد(نیشنل ٹائمز)سابق صدر آصف علی زرداری اورپی پی پی چیئرمین بلاول بھٹو زرداری نے ڈاکٹر عبدالقدیر خان کے انتقال پر گہرے دکھ و افسوس کو اظہار کیا ہے۔آصف علی زرداری نے کہا کہ ڈاکٹر عبدالقدیر خان کی ملک کیلئے خدمات ناقابل فراموش ہیں۔انہوں نے ڈاکٹر عبدالقدیر خان کی مغفرت اور بلند درجات کیلئے دعاکی ۔جبکہ اس موقع پر بلاول بھٹو زرداری نے کہا کہ پاکستان کا ایک عظیم محب وطن فرزند ہم سے بچھڑ گیا، آج ہر پاکستانی سوگوار ہے۔ڈاکٹر اے کیو خان نے ملک کے اس جوہری پروگرام کو پایئہ تکمیل پر پہنچایا۔ جس کی بنیاد قائدِ عوام نے رکھی تھی۔بلاول نے کہا کہ یہ شہید ذوالفقار علی بھٹو ہی تھے، جن کے کہنے پر ڈاکٹر اے کیو خان پاکستان کے جوہری پروگرام سے منسلک ہوگئے تھے۔ پاکستانی قوم ڈاکٹر اے کیو خان کی ہمیشہ مقروض رہے گی۔ ان کی خدمات ناقابلِ فراموش ہیں۔انہوں نے مزید کہا کہ دعاگو ہوں، اللہ تعالیٰ مرحوم کو اپنے جوارِ رحمت میں بلند درجات اور تمام سوگواران کو یہ صدمہ برداشت کرنے کا حوصلہ دے۔