اسلام آباد(نیشنل ٹائمز) سابق صدر پاکستان اور پاکستان پیپلزپارٹی پارلیمنٹیرینز کے صدر آصف علی زرداری نے معروف صحافی اور برطانیہ میں سابق ہائی کمشنر سید واجد شمس الحسن کے انتقال پر گہرے رنج و غم اور صدمے کا اظہار کیا ہے۔ آصف علی زرداری نے سید واجد شمس الحسن کو خراج عقیدت پیش کرتے ہوئے کہا کہ سید واجد شمس الحسن کے والد سید شمس الحسن قائداعظم کے 40سال ساتھی رہے جبکہ سید واجد شمس الحسن بھی زندگی بھر محترمہ بینظیر بھٹو شہید کے وفادار اور ثابت قدم بھائی رہے۔ سید واجد شمس الحسن کی ملک، پارٹی قیادت اور جمہوریت کے لئے بے مثال خدمات ہیں۔بھٹو خاندان کے اس عظیم دوست کے انتقال پر پارٹی قیادت اور کارکن سوگوار ہیں۔ سید واجد شمس الحسن نے برطانیہ میں بطور پاکستان کے ہائی کمشنر کشمیر کاز کو اجاگر کیا اور وہاں کے پارلیمنیٹیرینز صحافیوں اور دانشوروں کو مقبوضہ کشمیر کے مظلوموں کے لئے رائے عامہ ہموار کرنے پر راضی کیا۔ سابق صدر نے مرحوم سید واجد شمس الحسن کے خاندان سے تعزیت کا اظہار کرتے ہوئے کہا کہ ان کے انتقال پر میں بھی غمزدہ ہوں۔ اللہ تعالیٰ مرحوم سید واجد شمس الحسن کو جنت الفردوس میں بلند درجات عطا فرمائے اور ان کے خاندان کو یہ عظیم صدمہ برداشت کرنے کا حوصلہ عطا فرمائے۔