اسلام آباد(نیشنل ٹائمز)چیئرمین پاکستان پیپلز پارٹی بلاول بھٹو زرداری آج دوپہر اسلام آباد پہنچے اور انہوں نے انتہائی مصروف دن گزارا۔ آج ان سے ملاقاتیں کرنے والوں میں برطانوی ہائی کمشنر، امریکی ایمبیسی کی چارج ڈی افیئرز اور چین کے سفیر شامل تھے۔ عالمی قوتوں کے نمائندگان سے افغانستان کی بدلتی ہوئی صورت حال پر بات چیت، دوطرفہ تعلقات بھی زیربحث آئے۔
پاکستان میں برطانوی ہائی کمشنر کرسچن ٹرنر نے زرداری ہاؤ اسلام آباد میں چیئرمین بلاول بھٹو زرداری سے ملاقات میں دو طرفہ تعلقات پر تبادلہ خیال کیا اور انہوں نے افغانستان کی صورتحال پر بھی تفصیلی تبادلہ خیال کیا۔
برطانوی ہائی کمشنر نے بلاول بھٹو زرداری کو مطلع کیا کہ وہ سندھ کا دورہ کرنا چاہتے ہیں جس کا بلاول بھٹو زرداری نے خیرمقدم کیا۔ امریکہ کی چارج ڈی افیئرز انجیلا ایگلیر ے بھی چیئرمین بلاول بھٹو سے ملاقات کی اور دو طرفہ معاملات خاص طور پر افغانستان میں پیدا ہونے والی صورتحال پر تبادلہ خیال کیا۔
انہوں نے بھی چیئرمین بلاول بھٹو زرداری کو اپنے سندھ کے دورے کے بارے میں آگاہ کیا جس پر بلاول بھٹو زرداری نے ان کے سندھ کے دورے کا خیرمقدم کرتے ہوئے کہا کہ ان کا دورہ یقینا یادگار ثابت ہوگا اور وہ سندھ کے عوام کی مہمان نوازی کا لطف اٹھائیں گی۔
بعد میں شام کو چین کے سفیر نونگ رانگ نے بھی زرداری ہاؤس میں چیئرمین بلاول بھٹو زرداری سے ملاقات کی اور دونوں لیڈروں نے پاکستان اور چین کی لازوال اور تاریخی تعلقات پر گفتگو کی۔ چیئرمین بلاول اور چینی سفیر نے سی پیک پر بھی گفتگو کی۔ دونوں رہنماؤں نے افغانستان کی صورتحال پر بھی تبادلہ خیال کیا۔
