اسلام آباد (نیشنل ٹائمز)کراچی سمیت سندھ کے مختلف شہروں اور مشرقی بلوچستان میں آج بھی تیز ہواؤں اور گرج چمک کے ساتھ بارش کی پیش گوئی کی گئی ہے۔محکمہ موسمیات کی جانب سے سندھ اور مشرقی بلوچستان میں تیز ہواؤں اور گرج چمک کے ساتھ بارش کا امکان ظاہر کیا گیا ہے۔محکمہ موسمیات کے مطابق صوبہ سندھ کے چند مقامات پر موسلادھار بارش کی توقع ہے جبکہ ملک کے دیگر علاقوں میں موسم خشک اور مرطوب رہے گا۔خیال رہے کہ گذشتہ روز بھی کراچی کے مختلف علاقوں میں بارش ریکارڈ کی گئی تھی۔دوسری جانب وزیر بلدیات سندھ ناصرحسین شاہ کا کہنا ہے کہ تیز بارشوں کی پیش گوئی کو سامنے رکھتےہوئے سندھ میں رین ایمرجنسی نافذکر دی گئی ہے۔ناصر حسین شاہ کا کہنا ہے کہ بلدیاتی اداروں، محکمہ پبلک ہیلتھ انجینئرنگ، سندھ سالڈ ویسٹ مینجمنٹ بورڈ،کراچی واٹربورڈ اور واسا کو الرٹ رہنےکی ہدایات جاری کی گئی ہیں۔