ادیس ابابا (شِنہوا) 9 ویں چین بین الاقوامی درآمدی نمائش (سی آئی آئی ای) کے انعقاد کا وقت قریب آنے کے ساتھ ہی ایتھوپیا کی کافی کمپنی اے ڈبلیو او کافی کے اعلیٰ عہدیدار اس نمائش میں شرکت کی حتمی تیاریاں کر رہے ہیں۔ ان کا مقصد چین کی تیزی سے ترقی کرتی ہوئی کافی مارکیٹ میں موجود امکانات سے فائدہ اٹھانا ہے۔
گزشتہ سال کی نمائش میں کامیاب شرکت کے بعد اے ڈبلیو او کافی چین میں اپنی موجودگی کو مزید وسعت دینا چاہتی ہے۔ سی آئی آئی ای کمپنی کو ممکنہ خریداروں سے رابطے، اپنے اعلیٰ معیار کے برانڈ کے فروغ اور کاروباری شراکت داریوں کے قیام کے لئے ایک پلیٹ فارم فراہم کرتی ہے۔
کمپنی کے جنرل منیجر تیسفائے گیبرو نے حالیہ انٹرویو میں شِنہوا کو بتایا کہ ’’گزشتہ سال سی آئی آئی ای میں ہماری شرکت ہمارے لئے ایک کامیاب تجربہ ثابت ہوئی۔ ہم نے توقعات سے بڑھ کر نمایاں نتائج حاصل کئے۔‘‘ انہوں نے بتایا کہ پہلی مرتبہ شرکت سے کمپنی کو چینی صارفین کی جانب سے اپنی مصنوعات کے ردعمل کا اندازہ لگانے اور مضبوط تجارتی روابط قائم کرنے کا موقع ملا۔
کمپنی کے مارکیٹنگ منیجر کالیب فیکاد نے سی آئی آئی ای کو ایک اہم بین الاقوامی تجارتی پلیٹ فارم قرار دیا، جو ایتھوپیا کے کافی پیدا کرنے والوں اور برآمد کنندگان کو چین سمیت دنیا بھر کے ممکنہ خریداروں اور کاروباری شراکت داروں سے جوڑتا ہے۔
فیکاد نے کہا کہ ’’ہم نے اس سال دوسری مرتبہ نمائش میں شرکت کا فیصلہ اس لئے کیا ہے کیونکہ گزشتہ سال ہمارا تجربہ انتہائی کامیاب رہا تھا۔ اس سال ہمارا مقصد اپنے برانڈ کو مزید فروغ دینا اور چین میں کاروباری مواقع کو وسعت دینا ہے۔‘‘
9 ویں چین بین الاقوامی درآمدی نمائش 5 سے 10 نومبر تک شنگھائی میں منعقد ہوگی۔ منتظمین کے مطابق اس میں 162 ممالک، خطوں اور بین الاقوامی تنظیموں کے علاوہ بیرون ملک کی 4,142 نمائش کنندہ کمپنیاں شرکت کریں گی۔ نمائش کا مجموعی رقبہ پہلی مرتبہ 4 لاکھ 40 ہزار مربع میٹر سے تجاوز کر جائے گا۔
2018 میں دنیا کی پہلی قومی سطح کی درآمدات کے لئے مخصوص نمائش کے طور پر شروع ہونے والی سی آئی آئی ای کا مقصد چین کے کھلے پن کے عمل کو وسعت دینا اور اپنی وسیع مارکیٹ کو دنیا بھر کے ممالک کے لئے مشترکہ مواقع میں تبدیل کرنا ہے۔