قاہرہ (شِنہوا) مصری وزیر خارجہ بدر عبد العاطی نے کہا ہے کہ مصر تجارت، سرمایہ کاری، مقامی سطح پر صنعت کاری اور متبادل توانائی کے شعبوں میں چین کے ساتھ تعاون مزید گہرا کرنے کے لئے تیار ہے۔مصر کے نئے انتظامی دارالحکومت میں ایک پریس کانفرنس سے خطاب کرتے ہوئے عبد العاطی نے کہا کہ چینی صدر شی جن پھنگ کا حالیہ مصر کا سرکاری دورہ انتہائی اہم تھا کیونکہ یہ ایک دہائی میں ان کا مصر کا پہلا سرکاری دورہ تھا جو دونوں ممالک کے درمیان سفارتی تعلقات قائم ہونے کی 70 ویں سالگرہ کے موقع پر ہوا۔انہوں نے کہا کہ مصر ’چین-مصر ٹی ای ڈی اے سویز اقتصادی و تجارتی تعاون زون‘ کے اگلے مرحلے میں پیش رفت کر رہا ہے اور دونوں سربراہان مملکت کے درمیان اتفاق رائے کے امور پر عملدرآمد کے لئے کام کرے گا جس میں الیکٹرک گاڑیوں جیسی اہم صنعتوں کو مقامی سطح پر فروغ دینا شامل ہے۔عبد العاطی نے کہا کہ مصر توانائی بالخصوص قابل تجدید اور ماحول دوست توانائی کے شعبے میں بھی چین کے ساتھ تعاون مضبوط بنائے گا۔ ان کا کہنا تھا کہ ہم باہمی تجارت کے حجم اور اپنے تعاون میں اضافہ کریں گے اور یہاں چینی کمپنیوں کی آمد اور کام کا خیرمقدم کرتے ہیں۔عبد العاطی نے برکس تعاون کے حوالے سے کہا کہ دنیا اس وقت متعدد مشکلات اور بحرانوں کا شکار ہے اور یہ پلیٹ فارم اپنے رکن ممالک کے درمیان معاشی و تجارتی تعاون گہرا کرنے میں مددگار ثابت ہو سکتا ہے۔ انہوں نے مزید کہا کہ مصر برکس میں اپنی رکنیت کو قدر کی نگاہ سے دیکھتا ہے اور دیگر رکن ممالک کے ساتھ مزید قریبی تعاون کا منتظر ہے۔