بیجنگ (شِنہوا) چین اور بھارت کے خصوصی نمائندوں کے درمیان سرحدی معاملے پر مذاکرات کا 25 واں دور بیجنگ میں ہوا جس میں سرحدی معاملے اور دوطرفہ تعلقات جیسے امور پر جامع، تفصیلی، دوستانہ اور وسیع سطح پر تبادلہ خیال کیا گیا۔
کمیونسٹ پارٹی آف چائنہ کی مرکزی کمیٹی کے سیاسی بیورو کے رکن، مرکزی کمیشن برائے امور خارجہ کے دفتر کے ڈائریکٹر اور چین اور بھارت کے درمیان سرحدی معاملے پر چین کے خصوصی نمائندے وانگ یی نے کہا کہ چین اور بھارت کے تعلقات کا مضبوط اور مستحکم ہونا دونوں ممالک کے عوام کے بنیادی مفاد میں ہے۔
انہوں نے کہا کہ چین اور بھارت کے تعلقات دوطرفہ دائرہ کار سے بڑھ کر عالمی اور تزویراتی اہمیت رکھتے ہیں۔
وانگ نے کہا کہ چین تزویراتی اور طویل المدتی دوطرفہ تعلقات پروان چڑھانے، اچھا ہمسایہ و دوست اور ایک دوسرے کی کامیابی میں مددگار شراکت دار بننے کے لئے بھارت کے ساتھ مل کر کام کرنے اور ’’ڈریگن اور ہاتھی کے رقص‘‘ کو شرمندہ تعبیر کرنے کے لئے تیار ہے۔
وانگ نے کہا کہ دونوں فریق خصوصی نمائندوں کے اجلاس میں طے پانے والے اتفاق رائے پر منظم طریقے سے عملدرآمد کر رہے ہیں، دونوں ملکوں کو سرحدی معاملہ دوطرفہ تعلقات میں مناسب سطح پر رکھنا چاہیے، کسی جمود، پسپائی یا انحراف کے بغیر آگے بڑھنا چاہیے اور بتدریج چین اور بھارت کے سرحدی امور کے لئے ایک مثبت بیانیہ تشکیل دینا چاہیے تاکہ مکالمے، امن، مشاورت اور تعاون کو مرکزی دھارا بنایا جا سکے۔
بھارت کے خصوصی نمائندے اور قومی سلامتی کے مشیر اجیت دوول نے کہا کہ بھارت چین کے ساتھ تزویراتی روابط کو مزید فروغ دینے، سرحدی علاقوں کا موثر انتظام کرنے، سرحدی معاملے کے حل تلاش کرنے اور بھارت-چین تعلقات کی تیز رفتار بہتری اور ترقی کو فروغ دینے کا خواہاں ہے۔
دونوں فریقوں نے سرحدی مذاکرات آگے بڑھانے، سرحد کا مناسب انتظام اور کنٹرول کرنے، میکانزم کی تشکیل بہتر بنانے اور سرحد پار تعاون کو فروغ دینے پر تفصیلی تبادلہ خیال کیا۔
دونوں ملکوں نے اس عزم کا اعادہ کیا کہ وہ باہمی احترام اور افہام و تفہیم کے جذبے کے تحت سرحدی معاملے کا منصفانہ، معقول اور باہمی طور پر قابل قبول حل تلاش کریں گے۔
دونوں فریق بات چیت اور مشاورت کے ذریعے سرحدی معاملے کو مناسب طریقے سے حل کرنا جاری رکھیں گے اور سرحدی علاقوں میں امن و امان کو مشترکہ طور پر برقرار رکھیں گے۔
دونوں فریقوں نے اس بات پر بھی اتفاق کیا کہ وہ 2027 میں بھارت میں سرحدی معاملے پر دونوں ممالک کے خصوصی نمائندوں کے مذاکرات کا 26 واں دور منعقد کریں گے۔