بینکاک (شِنہوا) چین کے وزیراعظم لی چھیانگ نے کہا ہے کہ چین اور تھائی لینڈ ایک خاندان کی طرح قریب ہیں، یہ دونوں ممالک کے دوطرفہ تعلقات کا ایک منفرد فائدہ ہے، جس کا اظہار مختلف شعبوں میں عملی کامیابیوں سے ہوتا ہے۔
لی چھیانگ نے یہ بات بینکاک میں تھائی لینڈ کے بادشاہ مہا وجیرالونگ کورن سے ملاقات کے دوران کہی۔
چینی صدر شی جن پھنگ کی جانب سے بادشاہ کو پُرخلوص سلام پیش کرتے ہوئے لی نے کہا کہ گزشتہ سال بادشاہ کے دورہ چین کے دوران شی جن پھنگ نے ان سے بات چیت کی تھی اور دونوں فریقوں نے چین اور تھائی لینڈ کے درمیان مشترکہ مستقبل کے حامل معاشرے کی تعمیر کو آگے بڑھانے کے لیے اہم اتفاق رائے کیا تھا۔
لی نے کہا کہ چین اس بات کو سراہتا ہے کہ تھائی شاہی خاندان نے طویل عرصے سے چین اور تھائی لینڈ کی دوستی کو بہت اہمیت دی ہے اور اس کے فروغ کے لیے مسلسل کوششیں کی ہیں۔
انہوں نے کہا کہ موجودہ ہنگامہ خیز بین الاقوامی صورتحال میں مختلف مشکلات کے باوجود چین اور تھائی لینڈ کے درمیان اقتصادی اور تجارتی تعاون میں مسلسل اضافہ خاص طور پر قابلِ ستائش ہے۔
لی نے کہا کہ چین دونوں ممالک کے سربراہانِ مملکت کی تزویراتی رہنمائی میں تھائی لینڈ کے ساتھ مل کر قریبی روابط برقرار رکھنے، سرمایہ کاری، تکنیکی جدت، نئی توانائی سے چلنے والی گاڑیوں اور دیگر شعبوں میں تعاون کو وسعت دینے، عوامی سطح پر تبادلوں کو گہرا کرنے اور دونوں ممالک کی اقتصادی و سماجی ترقی کو فروغ دینے کے لیے تیار ہے تاکہ دونوں ملکوں کے عوام کی فلاح و بہبود میں مزید اضافہ ہو۔
تھائی لینڈ کے بادشاہ نے لی سے کہا کہ وہ صدر شی جن پھنگ کو ان کی جانب سے مخلصانہ سلام اور نیک تمنائیں پہنچائیں۔
گزشتہ سال اپنے دورہ چین کو یاد کرتے ہوئے بادشاہ نے کہا کہ صدر شی جن پھنگ کے ساتھ ان کی کامیاب ملاقات نتیجہ خیز رہی اور اس کی یادیں اب بھی ان کے ذہن میں تازہ ہیں۔
بادشاہ نے کہا کہ لی کے سرکاری دورہ تھائی لینڈ سے تھائی لینڈ اور چین کے درمیان روایتی دوستی مزید مستحکم ہوگی اور دونوں ممالک کے درمیان عملی تعاون کو مزید گہرا کرنے میں مدد ملے گی۔
چین اور تھائی لینڈ ایک خاندان کی طرح قریب ہیں، چینی وزیراعظم



