لندن (شِنہوا) سوسائٹی آف موٹر مینوفیکچررز اینڈ ٹریڈرز (ایس ایم ایم ٹی) نے خبردار کیا ہے کہ یورپی یونین (ای یو) کے تجارتی اقدامات اگلے سال برطانوی گاڑیوں کی پیداوار میں متوقع بحالی کے لئے خطرہ ہیں۔
ایس ایم ایم ٹی نے کہا کہ صنعت کے ایک آزادانہ اندازے کے مطابق رواں سال گاڑیوں کی سالانہ پیداوار میں کمی آئے گی جس کے بعد 2027 میں یہ بڑھ کر 7 لاکھ 52 ہزار یونٹس تک پہنچ جائے گی کیونکہ نئے ماڈلز میں شامل زیادہ تر الیکٹرک گاڑیوں (ای وی) کی پیداوار شروع ہو جائے گی۔
ایس ایم ایم ٹی نے اس صنعت کی مسابقت کے لئے تین بڑے خطرات کی نشاندہی کی جن میں سے دو برطانیہ کے یورپی یونین کے ساتھ تجارتی تعلقات سے متعلق ہیں۔
تنظیم کے مطابق یورپی کمیشن کی ’’میڈ ان ای یو‘‘ تجاویز موجودہ شکل میں برطانوی ساختہ گاڑیوں کو ان کی سب سے بڑی برآمدی منڈی یعنی یورپی یونین سے عملی طور پر باہر کر سکتی ہیں۔
ایس ایم ایم ٹی نے یہ خبردار بھی کیا کہ تجارتی تعاون کے معاہدے کے تحت 2027 میں نافذ ہونے والے سخت رولز آف اوریجن کے نتیجے میں الیکٹرک گاڑیوں کی دوطرفہ تجارت پر سالانہ 1.4 ارب پاؤنڈ (تقریباً 1.9 ارب امریکی ڈالر) کے محصول عائد ہو سکتے ہیں۔
ایس ایم ایم ٹی کے اعداد و شمار سے معلوم ہوا کہ ستمبر میں برطانوی گاڑیوں کی کل پیداوار کا تین چوتھائی سے زیادہ حصہ برآمد کیا گیا جس میں سے 57.5 فیصد برآمدات یورپی یونین کو کی گئیں۔
ایس ایم ایم ٹی کا کہنا تھا کہ ان اقدامات سے دونوں جانب گاڑیوں کی صنعت کو نقصان پہنچے گا، تنظیم نے آنے والی یورپی یونین-برطانیہ سربراہی کانفرنس کو عملی حل پر متفق ہونے اور 80 ارب یورو (تقریباً 90 ارب ڈالر) کے تجارتی تعلقات محفوظ بنانے کا ایک اہم موقع قرار دیا۔