کراچی (نیشنل ٹائمز) سندھ اسمبلی نے رینجرز کے اختیارات میں مزید ایک سال کی توسیع کی قرارداد متفقہ طور پر منظور کرلی۔

صوبائی وزیر قانون ضیا لنجار نے رینجرز کے اختیارات میں توسیع کی قرارداد ایوان میں پیش کی، جس میں کہا گیا کہ رینجرز نے پولیس اور دیگر قانون نافذ کرنے والے اداروں کے تعاون سے جرائم کے خلاف مؤثر کارروائیاں کی ہیں۔

قرارداد کے مطابق رینجرز کی کارروائیوں کے نتیجے میں ٹارگٹ کلنگ، اسٹریٹ کرائم اور دیگر سنگین جرائم میں نمایاں کمی واقع ہوئی ہے۔

قرارداد میں کہا گیا کہ امن و امان برقرار رکھنے اور شہریوں کے جان و مال کے تحفظ کے لیے رینجرز کی تعیناتی جاری رکھنا ضروری ہے، لہٰذا آئین کے آرٹیکل 147 کے تحت اختیارات میں مزید ایک سال کی توسیع کی جائے۔

دوسری جانب سندھ اسمبلی نے قائداعظم محمد علی جناح کو خراج عقیدت پیش کرنے کی قرارداد بھی متفقہ طور پر منظور کرلی۔ ایوان نے فاطمیہ انٹرنیشنل یونیورسٹی، اقراء یونیورسٹی اور بے نظیر بھٹو ہیومن ریسرچ بورڈ سے متعلق ترمیمی بلز کی بھی منظوری دے دی۔