کراچی (نیشنل ٹائمز) کراچی ایئرپورٹ ہیلتھ ڈیپارٹمنٹ نے اعلان کیا ہے کہ 14 ستمبر سے نادرا ویکسینیشن سرٹیفکیٹ کے بغیر مسافروں کو بین الاقوامی سفر کی اجازت نہیں دی جائے گی۔

ایئرپورٹ ہیلتھ ڈیپارٹمنٹ کے مطابق عمرہ زائرین سمیت تمام بین الاقوامی مسافروں کے لیے روانگی سے قبل نادرا ویکسینیشن کارڈ حاصل کرنا لازمی ہوگا۔

جاری کردہ اعلامیے میں بتایا گیا ہے کہ بین الاقوامی مسافروں کی ویکسینیشن کے لیے فیڈرل گورنمنٹ سول ڈسپنسری کو واحد مجاز مرکز قرار دیا گیا ہے۔

اعلامیے کے مطابق ایئرلائنز کی ذمہ داری ہوگی کہ وہ عمرہ زائرین کے ویکسینیشن سرٹیفکیٹس کی باقاعدہ تصدیق یقینی بنائیں۔

ایئرپورٹ ہیلتھ ڈیپارٹمنٹ نے مزید کہا کہ ایئرپورٹ پر ویکسین لگوانے والے مسافروں کو اپنی پرواز کے مقررہ وقت سے کم از کم 6 گھنٹے قبل ایئرپورٹ پہنچنا ہوگا۔ بین الاقوامی روانگی کے موقع پر ویکسینیشن اور آن لائن رجسٹریشن کا عمل بھی مکمل کیا جائے گا۔