شنگھائی (شِنہوا) چین کی گاڑیاں بنانے والی معروف کمپنی ایس اے آئی سی موٹر اور جنرل موٹرز (جی ایم) نے بدھ کے روز اپنے مشترکہ منصوبے کی شراکت داری میں مزید 20 سال کی توسیع کا اعلان کرتے ہوئے اسے 2047 تک برقرار رکھنے پر اتفاق کیا ہے۔
دونوں کمپنیوں نے کہا کہ شراکت داری کی تجدید تقریباً 30 سال کے کامیاب تعاون کی بنیاد پر کی گئی ہے۔ ان کے مطابق گاڑیوں کی عالمی صنعت میں بڑی تبدیلیوں کے باوجود دونوں کمپنیوں نے چین کی گاڑیوں کی منڈی کی طویل المدتی اہمیت پر اپنے اعتماد کا اظہار کیا ہے۔
دونوں کمپنیوں کے شیئر ہولڈرز ٹیکنالوجی کی تحقیق و ترقی (آر اینڈ ڈی)، ترسیلی سلسلے اور عالمی منڈی کے وسائل میں مزید تعاون کریں گے جبکہ ایس اے آئی سی جنرل موٹرز کمپنی لمیٹڈ کی ذہین اور برقی گاڑیوں کی جانب منتقلی، مقامی جدت، عالمی توسیع اور طویل المدتی ترقی کے لئے مسلسل معاونت فراہم کریں گے۔
مشترکہ کمپنی 2030 تک نئی توانائی سے چلنے والی گاڑیوں کے کم از کم 30 ماڈلز متعارف کرائے گی جس سے وہ چین میں نئی توانائی کی گاڑیاں بنانے والے نمایاں برانڈز میں شامل ہوجائے گی۔
سمارٹ ٹیکنالوجی کے میدان میں کمپنی مقامی تحقیق کو فروغ دے گی، چینی ٹیکنالوجی صنعت کے ساتھ تعاون بڑھائے گی اور جدید خودکار ڈرائیونگ سمیت نئی ٹیکنالوجی تیزی سے متعارف کرائے گی۔
کمپنی نئی توانائی سے چلنے والی گاڑیوں کے بیرون ملک کاروبار میں بھی سرمایہ کاری بڑھائے گی۔ بیوک الیکٹرا ای 7 کو اکتوبر میں باضابطہ طور پر بیرون ملک منڈیوں میں برآمد کیا جائے گا جو بیوک برانڈ اور کمپنی کی پہلی اعلیٰ معیار کی نئی توانائی سے چلنے والی گاڑی ہوگی جو عالمی منڈی میں متعارف کرائی جائے گی۔
صنعتی ماہرین کا کہنا ہے کہ ایس اے آئی سی جنرل موٹرز کمپنی لمیٹڈ کئی دہائیوں سے چین اور امریکہ کے درمیان مشترکہ منصوبوں کی نمایاں مثال رہی ہے اور اسے چین کی اصلاحات اور وسعت کی پالیسی اور اس کی کارساز صنعت کی جدت کا ایک اہم ثمر قرار دیا جاتا ہے۔