کراچی (نیشنل ٹائمز) کے الیکٹرک نے سوشل میڈیا پر گردش کرنے والے اس دعوے کو غلط قرار دیا ہے جس میں کہا جا رہا تھا کہ اگر کوئی پروٹیکٹڈ صارف ایک ماہ میں 200 یونٹس سے زیادہ بجلی استعمال کر لے تو وہ ہمیشہ کے لیے پروٹیکٹڈ کیٹیگری سے باہر ہو جائے گا۔

ادارے کی جانب سے جاری وضاحتی بیان میں کہا گیا ہے کہ پروٹیکٹڈ صارفین سے متعلق پالیسی میں کوئی نئی تبدیلی نہیں کی گئی اور سوشل میڈیا پر پھیلائی جانے والی یہ معلومات حقائق کے منافی ہیں۔

ترجمان کے مطابق نان ٹی او یو (Non-TOU) رہائشی صارف اگر کسی ایک ماہ کے دوران 200 یونٹس سے زیادہ بجلی استعمال کرے تو اس کا پروٹیکٹڈ اسٹیٹس مستقل طور پر ختم نہیں ہوتا۔ اگر اس کے بعد وہ مسلسل چھ ماہ تک ہر ماہ 200 یا اس سے کم یونٹس استعمال کرے تو مقررہ قواعد کے تحت اس کا پروٹیکٹڈ اسٹیٹس دوبارہ بحال کیا جا سکتا ہے۔

کے الیکٹرک نے صارفین سے اپیل کی ہے کہ بجلی کے بل، پروٹیکٹڈ کیٹیگری یا دیگر پالیسیوں سے متعلق کسی بھی اطلاع پر یقین کرنے سے پہلے ادارے کے سرکاری ذرائع سے اس کی تصدیق ضرور کریں اور سوشل میڈیا پر گردش کرنے والی غیر مصدقہ خبروں سے گریز کریں۔

ترجمان نے مزید کہا کہ صارفین کی رہنمائی کے لیے تمام مستند معلومات کے الیکٹرک کے سرکاری پلیٹ فارمز پر دستیاب ہیں، اس لیے افواہوں یا غیر تصدیق شدہ اطلاعات کی بنیاد پر پریشان ہونے کی ضرورت نہیں۔