یانگون (شِنہوا) ڈھولوں کی ہم آہنگ تھاپ اور لائن اینڈ ڈریگن رقص کرنے والے فنکاروں کی پرجوش حرکات نے میانمار انٹرنیشنل آٹو ایکسپو 2026 کے افتتاح کو یادگار بنا دیا، جس سے ایک ایسی نمائش کا آغاز ہوا جہاں چینی آٹو موبائل برانڈز سب کی توجہ کا مرکز بنے رہے۔
یانگون کنونشن سنٹر میں اتوار تک جاری رہنے والی تین روزہ نمائش میں 20 بین الاقوامی شہرت یافتہ اصل آلات تیار کرنے والی کمپنیاں (او ای ایمز) اور آٹو موٹو سپلائی چین سے متعلق 20 سے زائد کمپنیاں شریک ہیں۔
نمائش میں برقی گاڑیوں (ای ویز)، کمرشل ٹرکوں، موٹر سائیکلوں اور جدید آٹوموٹو ٹیکنالوجیز کی وسیع رینج پیش کی گئی جبکہ شرکاء میں چینی نمائش کنندگان کی اکثریت رہی۔
نمایاں گاڑیوں میں چین کی معروف برقی گاڑیاں بنانے والی کمپنی بی وائی ڈی کی گاڑیاں شامل تھیں جنہیں میانمار میں ای وی پاور کمپنی کے ذریعے درآمد اور تقسیم کیا جاتا ہے۔
ای وی پاور کمپنی کے منیجنگ ڈائریکٹر یو من من مونگ نے بتایا کہ ان کی کمپنی میانمار میں بی وائی ڈی گاڑیوں کی درآمد اور تقسیم کرتی ہے اور انہیں آٹوموبائل صنعت میں 30 سال سے زائد کا تجربہ حاصل ہے۔
یو من من مونگ نے کہا کہ نمائش میں ٹیکسی سروسز کے لئے ای 2 اور ای 6 ماڈلز جبکہ ذاتی استعمال کے لئے سانگ ایل اور آٹو 3 ماڈلز پیش کئے گئے ہیں۔
یو من من مونگ نے چین کو ای وی کی ترقی میں عالمی رہنما قرار دیتے ہوئے کہا کہ میانمار کی ای وی مارکیٹ میں بھرپور صلاحیت ہے تاہم بھرپور پالیسی معاونت کی ضرورت ہے۔
یو من من مونگ کے مطابق اس سال نمائش کے پہلے روز گزشتہ برس کے مقابلے میں زیادہ افراد نے شرکت کی جو برقی گاڑیوں میں عوامی دلچسپی میں اضافے کی عکاسی کرتا ہے۔
یانگون کے علاقے یانکین سے تعلق رکھنے والے 50 سالہ شخص یو میو کیاؤ نے بتایا کہ وہ نئی گاڑیوں کے ماڈلز دیکھنے کے لئے نمائش میں آئے ہیں۔
یو میو کیاؤ نے کہا کہ ’’میں تقریباً ایک سال سے ڈونگ فینگ کی گاڑی استعمال کر رہا ہوں اور اب تک اس کی کارکردگی بہت اچھی رہی ہے، کسی قسم کا مسئلہ پیش نہیں آیا۔‘‘
نمائش کے منتظم ادارے میانمار ڈی پی ای ایس ایگزیبیشن کمپنی لمیٹڈ کے جنرل منیجر وانگ ژانگ چھینگ نے کہا کہ اس سال کی نمائش حجم اور شرکاء کی تعداد کے لحاظ سے نئے ریکارڈ قائم کر رہی ہے۔
وانگ ژانگ چھینگ نے بتایا کہ نمائش میں پٹرول سے چلنے والی گاڑیاں، برقی گاڑیاں، کمرشل ٹرک، موٹر سائیکلیں، آٹو پارٹس، ای وی چارجنگ سٹیشنز، بینکاری و مالیاتی خدمات اور انشورنس سمیت متعدد شعبے شامل ہیں۔
ان کے مطابق 3 روزہ تقریب کے دوران نئی مصنوعات کی رونمائی، تکنیکی تبادلہ خیال اور کاروباری روابط بڑھانے کے لئے خصوصی سرگرمیاں بھی منعقد کی جائیں گی۔