بیجنگ (شِنہوا) چین میں 2026 کی پہلی ششماہی کے دوران نئی رجسٹر ہونے والی تمام گاڑیوں میں نئی توانائی سے چلنے والی گاڑیوں (این ای ویز) کا حصہ 49.42 فیصد رہا، جو گزشتہ سال کی اسی مدت کے مقابلے میں 4.45 فیصد پوائنٹس زیادہ ہے۔
چین کی وزارت عوامی تحفظ کے اعداد و شمارکے مطابق جنوری سے جون کے دوران وزارت کے ماتحت ٹریفک حکام نے 51 لاکھ 90 ہزار سے زائد این ای ویز، مجموعی طور پر ایک کروڑ 5 لاکھ 10 ہزار سے زائد گاڑیوں اور 51 لاکھ 10 ہزار موٹر سائیکلوں کی رجسٹریشن کی۔
جون کے اختتام تک چین میں گاڑیوں کی مجموعی تعداد 47 کروڑ 60 لاکھ تک پہنچ گئی، جن میں 37 کروڑ 10 لاکھ موٹر گاڑیاں شامل ہیں۔ اسی عرصے میں ڈرائیونگ لائسنس رکھنے والوں کی تعداد 56 کروڑ 70 لاکھ رہی، جن میں سے 53 کروڑ 30 لاکھ موٹر گاڑیوں کے ڈرائیور ہیں۔
چین میں این ای ویز کی مجموعی تعداد 4 کروڑ 89 لاکھ 70 ہزار تک پہنچ گئی، جو ملک میں رجسٹرڈ تمام موٹر گاڑیوں کا 13.19 فیصد بنتی ہے، جبکہ نئی توانائی سے چلنے والی گاڑیوں میں سے 68.77 فیصد مکمل طور پر برقی گاڑیاں ہیں۔