بیجنگ (شِنہوا) چین نے اپنے دیہی علاقوں میں نئی توانائی والی گاڑیوں (این ای ویز) کی فروخت بڑھانے کے لئے ایک نئی مہم شروع کرنے کا اعلان کیا ہے۔ اس مہم کا مقصد گاڑیوں کے تبادلے کی سہولت کو بہتر بنانا اور دیہی علاقوں میں این ای وی کے استعمال کے لئے مزید معاونت فراہم کرنا ہے۔
چین کی وزارت صنعت و انفارمیشن ٹیکنالوجی (ایم آئی آئی ٹی) کے مطابق یہ مہم چار دیگر سرکاری اداروں کے ساتھ مل کر چلائی جائے گی۔ اس مہم کے تحت ایسے این ای وی ماڈلز منتخب کئے جائیں گے جو دیہی صارفین کی ضروریات کو پورا کرتے ہوں، اچھی شہرت رکھتے ہوں اور قابل اعتماد معیار کے حامل ہوں۔
مہم کے حصے کے طور پر گاڑیوں کی تبدیلی کے لئے مخصوص سیکشن قائم کئے جائیں گے، جہاں ایک ہی جگہ پر پرانی گاڑی کی جانچ، قیمت لگانے اور دوبارہ کارآمد بنانے جیسی سہولیات فراہم کی جائیں گی۔
اس کے علاوہ ان کاؤنٹی اور دیہی علاقوں کا انتخاب کیا جائے گا جہاں این ای وی کا استعمال ابھی نسبتاً کم ہے لیکن وہاں مارکیٹ کی بڑی صلاحیت موجود ہے اور وہاں آف لائن تشہیری سرگرمیاں منعقد کی جائیں گی۔
صارفین کو راغب کرنے کے لئے گاڑیوں کی نمائش اور آزمائشی ڈرائیو جیسے تجرباتی سرگرمیوں کا بھی اہتمام کیا جائے گا تاکہ قریبی شہروں اور دیہات کے لوگ بھی شرکت کر سکیں۔
مزید یہ کہ این ای وی فروخت کے مراکز، بعد از فروخت مرمت کی خدمات فراہم کرنے والے ادارے، چارجنگ اور بیٹری تبدیل کرنے والی کمپنیاں اور انشورنس و قرض فراہم کرنے والے اداروں کو بھی اس مہم میں شامل ہونے کی ترغیب دی جائے گی تاکہ دیہی علاقوں میں این ای وی کے استعمال کے لئے بہتر سہولیات اور ماحول فراہم کیا جا سکے۔