اسلام آباد (نیشنل ٹائمز) وفاقی حکومت نے بجٹ 2026-27 میں درآمدی اور بڑی گاڑیوں پر نئے ٹیکس عائد کرنے کی تجویز پیش کردی ہے۔

وزیر خزانہ محمد اورنگزیب نے بجٹ تقریر میں اعلان کیا کہ درآمد کی جانے والی گاڑیوں پر فیڈرل ایکسائز ڈیوٹی عائد کی جائے گی۔ اس کے علاوہ 2 ہزار سے 3 ہزار سی سی تک کی ایس یو ویز پر بھی فیڈرل ایکسائز ڈیوٹی لگانے کی تجویز دی گئی ہے۔

بجٹ دستاویزات کے مطابق 3 ہزار سی سی سے زائد انجن والی گاڑیوں پر فیڈرل ایکسائز ڈیوٹی میں اضافے کی تجویز بھی شامل ہے جبکہ 2 کروڑ روپے سے زائد مالیت کی الیکٹرک گاڑیوں کو بھی فیڈرل ایکسائز ڈیوٹی کے دائرے میں لانے کا فیصلہ کیا گیا ہے۔

تاہم حکومت نے الیکٹرک موٹرسائیکلوں، رکشوں اور بسوں کے لیے موجودہ ٹیکس مراعات برقرار رکھنے کا اعلان کیا ہے جبکہ درآمدی الیکٹرک ٹرکوں پر ایک فیصد سیلز ٹیکس سہولت دینے کی تجویز بھی پیش کی گئی ہے۔