بیجنگ (شِنہوا) چین میں الیکٹرک گاڑیوں کے لئے چارجنگ انفراسٹرکچر میں تیزی سے اضافہ جاری ہے کیونکہ ملک الیکٹرک گاڑیوں کے وسیع استعمال کو فروغ دینے کے لئے معاون سہولیات کو بہتر بنا رہا ہے۔
قومی توانائی انتظامیہ کے مطابق اپریل 2026 کے اختتام تک ملک بھر میں چارجنگ سہولیات کی مجموعی تعداد 2 کروڑ 19 لاکھ 60 ہزار تک پہنچ گئی جو گزشتہ سال کے مقابلے میں 47.4 فیصد زیادہ ہے۔
مجموعی طور پر عوامی چارجنگ سہولیات کی تعداد 49 لاکھ 10 ہزار رہی جس میں سالانہ بنیاد پر 29.6 فیصد اضافہ ریکارڈ کیا گیا۔ ان سہولیات کی مجموعی چارجنگ صلاحیت 23 کروڑ 70 لاکھ کلوواٹ تک پہنچ گئی۔
چین الیکٹرک گاڑیوں کے معاون نیٹ ورک کو وسعت دینے کی کوششیں مسلسل جاری رکھے ہوئے ہے۔ اکتوبر 2025 میں ملک نے الیکٹرک گاڑیوں کی چارجنگ سہولیات بہتر بنانے کے لئے 3 سالہ عملی منصوبہ متعارف کرایا تھا جس کے تحت 2027 کے اختتام تک ملک بھر میں 2 کروڑ 80 لاکھ چارجنگ سہولیات قائم کرنے اور عوامی چارجنگ صلاحیت کو 30 کروڑ کلوواٹ سے زیادہ تک پہنچانے کا ہدف مقرر کیا گیا ہے۔