جوہانسبرگ (شِنہوا) جنوبی افریقہ کے شہر جوہانسبرگ میں جاری سولر اینڈ سٹوریج لائیو افریقہ 2026 نمائش میں قابل تجدید توانائی کی بڑی چینی کمپنیاں مرکز نگاہ بن گئی ہیں۔ یہ پیش رفت افریقہ کے تیزی سے پھیلتے ہوئے صاف توانائی کے شعبے میں چین کے بڑھتے ہوئے کلیدی کردار کی عکاسی کرتی ہے۔
براعظم کی سب سے بڑی قابل تجدید توانائی نمائش قرار دی جانے والی اس تقریب میں پائیدار توانائی کی جانب منتقلی کو آگے بڑھانے والی جدید ٹیکنالوجیز کو یکجا کیا گیا ہے۔اس سال چینی کمپنیوں نے نمائش کے متعدد ہالز میں نمایاں موجودگی اختیار کرتے ہوئے جدید شمسی پینلز، بیٹری سٹوریج نظام اور سمارٹ توانائی کے حل پیش کئے۔
انڈسٹری کے بڑے نام کنٹیمپریری ایمپیریکس ٹیکنالوجی (سی اے ٹی ایل)، لونگی گرین انرجی، ٹی بی ای اے کمپنی اور ہواوے مندوبین، سرمایہ کاروں اور پالیسی سازوں کی خصوصی توجہ کا مرکز بنے ہوئے ہیں۔ ان کمپنیوں کے سٹالز پر اعلیٰ کارکردگی کے حامل فوٹو وولٹک ماڈیولز، مربوط سٹوریج سسٹمز اور ابھرتی ہوئی مارکیٹوں کی ضروریات کے مطابق تیار کردہ ڈیجیٹل انرجی پلیٹ فارمز نمائش کے لئے پیش کئے گئے ہیں۔
کوموڈور انڈسٹریز کے چیف ایگزیکٹو آفیسر ٹوکولوگو فیتلا نے اس حوالے سے گفتگو کرتے ہوئے کہا کہ چینی کمپنیوں کی بڑے پیمانے پر شرکت ان کی مینوفیکچرنگ کی صلاحیت اور افریقہ میں ان کے سٹریٹجک مفاد دونوں کی عکاسی کرتی ہے۔ وہ نہ صرف آلات فراہم کر رہے ہیں بلکہ توانائی کے مکمل اور جامع حل بھی پیش کر رہے ہیں۔