اسلام آباد(نیشنل ٹائمز) نائب وزیرِاعظم اسحاق ڈار نے متحدہ عرب امارات کے نائب وزیرِاعظم شیخ عبداللہ بن زاید النہیان سے ٹیلیفونک رابطہ کیا، جس میں خطے کی بدلتی ہوئی صورتحال پر تفصیلی تبادلۂ خیال کیا گیا۔اسحاق ڈار نے خطے میں امن اور استحکام کی اہمیت پر زور دیتے ہوئے فوری کشیدگی میں کمی کی ضرورت پر زور دیا۔ انہوں نے واضح کیا کہ مسائل کے پائیدار حل کے لیے مکالمہ اور سفارتکاری ہی واحد مؤثر راستہ ہیں۔انہوں نے حالیہ واقعات میں قیمتی انسانی جانوں کے ضیاع پر گہرے دکھ اور افسوس کا اظہار کیا، جن میں تین پاکستانی شہری بھی شامل ہیں۔ انہوں نے اس مشکل گھڑی میں متحدہ عرب امارات کے ساتھ پاکستان کی مکمل یکجہتی کا اعادہ کیا۔گفتگو کے اختتام پر دونوں رہنماؤں نے عید کی مبارکباد کا تبادلہ کیا اور مستقبل میں قریبی رابطے میں رہنے پر اتفاق کیا۔دریں اثنا نائب وزیر اعظم اسحاق ڈار سے برطانیہ کی ہائی کمشنر جین میریٹ نے ملاقات کی، جس میں خطے کی بدلتی ہوئی صورتحال پر تفصیلی تبادلہ خیال کیا گیا۔ ملاقات کے دوران دونوں رہنماؤں نے موجودہ علاقائی کشیدگی اور اس کے ممکنہ اثرات پر گفتگو کی۔ اسحاق ڈار نے اس موقع پر زور دیا کہ مسائل کے حل کے لیے سفارتکاری اور بامعنی مذاکرات ہی واحد مؤثر راستہ ہیں۔انہوں نے جاری تنازع کے جلد از جلد حل کی ضرورت پر بھی زور دیا اور کہا کہ خطے میں امن و استحکام کے قیام کے لیے فوری اقدامات ناگزیر ہیں۔علاوہ ازیں اسحاق ڈار سے چین کے سفیر جیانگ زائیڈونگ نے بھی ملاقات کی ، فریقین نے خطے کی مجموعی صورتحال، بدلتی ہوئی علاقائی پیش رفت اور وسیع تر عالمی حالات پر تفصیلی تبادلہ خیال کیا۔اسحاق ڈار نے کہا پاکستان خطے اور اس سے باہر امن و استحکام کے قیام کیلئے پختہ عزم رکھتا ہے ، ملاقات میں سکیورٹی، اقتصادی روابط اور دوطرفہ تعاون کے فروغ پر بھی بات چیت ہوئی۔