اسلام آباد(نیشنل ٹائمز) مظفر آباد میں کشمیری عمائدین اور ویٹرنز سے خطاب کرتے ہوئے آرمی چیف کا کہنا تھا کہ کشمیر کا فیصلہ کسی غاصب فوج کو نہیں کشمیر کے عوام کو کرنا ہے،کشمیر اور پاکستان کا رشتہ لازم و ملزوم ہے۔آرمی چیف کا کہنا تھا کشمیر بنےگا پاکستان، کشمیر کل بھی اور آج بھی پاکستان کا حصہ تھا اور رہےگا، آزادی کی شمع کشمیریوں کی ایک پیڑھی دوسری پیڑھی کے سپرد کرتی چلی آ رہی ہے، اللّٰہ تعالیٰ نے کشمیر کی سر زمین کو قدرتی حسن اور وسائل سے نوازا ہے، آج،کل یا تھوڑے عرصےتک تو مقبوضہ کشمیرمیں زیادتی کرسکتے ہو مگر ہمیشہ نہیں۔آرمی چیف کا کہنا تھا کہ کشمیر کی خاطر تین جنگیں لڑی ہیں، دس اور لڑنی پڑیں تو ان شاء اللّٰہ لڑیں گے، اگر ہم متحد اور مضبوط رہیں تو ہم ہر مشکل کا سامنا کر سکتے ہیں۔ اس سے قبل آرمی چیف جنرل عاصم منیر نے مظفر آباد میں یادگار شہدا پر حاضری دی اور پھول چڑھائے۔جوانوں سے خطاب میں آرمی چیف نے کہا کہ بھارت کی ریاستی سرپرستی میں ہونے والے جبر کے خلاف پاکستان ہمیشہ کشمیریوں کے ساتھ کھڑا رہےگا،کشمیر ایک دن کشمیری عوام کی مرضی اور تقدیر کے مطابق پاکستان کا حصہ ہوگا ، کسی بھی جارحیت کا بھرپور جواب دیا جائےگا۔