اسلام آباد(نیشنل ٹائمز)بین الصوبائی رابطے کی وزیر ڈاکٹر فہمیدہ مرزا کا کہنا ہے کہ پاکستان فٹ بال کے امیج کو بہتر کرنے اور بین الااقومی سطح پر اس کا تشخص بحال کرنے کے لئے عملی طور پر کام کا آغاز کردیا ہے۔اس سلسلے میں انہوں نے پاکستان فٹ بال کے مفاد میں تمام فریقوں کیساتھ بات چیت کی ہے، انہیں اس بات پر قائل کیا ہے کہ پاکستان فٹ بال کا مفاد ہم سب کے لئے اولین ترجیح ہونی چاہیے۔جیو نیوز کے پروگرام اسکور میں میزبان سید یحییٰ حسینی کیساتھ گفتگو کرتے ہوئے ڈاکٹر فہمیدہ مرزا کا کہنا تھا کہ پاکستان فٹ بال میں چار مختلف گروپس ہیں، سب کے علیحدہ مفادات ہیں، بہت سی باتوں پر سب کے درمیان اختلافات موجود ہیں۔ڈاکٹر فہمیدہ مرزا کا مزید کہنا تھا کہ اپنی کوششوں سے سب کو ایک بات پر یکجا کرنے کی کوشش کی، جس میں بہت حد تک کامیابی بھی ملی ہے۔ان کا کہنا تھا کہ پاکستان فٹ بال کے معاملات فیفا نارملائزیشن کمیٹی کے سپرد کر دیئے جائیں گے، تاکہ ملک میں فٹ بال کے معاملات آگے بڑھ سکیں۔انہوں نے کہا کہ فیفا نارملائزیشن کمیٹی کیساتھ مل کر اس بات کو یقینی بنائیں گے، کہ پاکستان فٹ بال میں جعلی فٹ بال کلبوں کی سر کوبی کی جائے، ساتھ ہی فٹ بال کلبوں کی سطح پر انتخابات کے عمل کو شفاف انداز میں آگے بڑھایا جائے۔