واشنگٹن (نیشل ٹائمز) امریکی کانگریس نے ایشیائی نژاد امریکیوں کے خلاف تشدد کے واقعات پر قابو پانے کی خاطر اکثریتی رائے سے ایک قانون کی منظوری دے دی۔ امریکی کانگریس میں پیش کیے گئے اس بل پر بحث کے دوران دونوں سیاسی جماعتوں نے کورونا وائرس کی وبا کے دوران ایشیائی نژاد امریکیوں اور بحرالکاہل جزائر کے لوگوں کے خلاف ہونے والے حملوں میں اضافے کی مذمت کی۔ ایوان کی اسپیکر نینسی پلوسی نے بل کا خیر مقدم کرتے ہوئے کہا کہ یہ اقدام نہ صرف وبا کے دوران بلکہ آئندہ برسوں میں بھی امریکا میں نفرت انگیز جرائم سے نمٹنے میں معاون ثابت ہوگا۔ صدر جو بائیڈن نے اس قانون کی حمایت کی ہے۔ یہ قانون ایک ایسے وقت پر منظور ہوا ہے جب کووڈ کی وبا کے دوران ایشیائی امریکیوں کے خلاف حملوں بشمول قتل کے واقعات میں اضافہ ہوا ہے۔