اسلام آباد(نیشنل ٹائمز)سرکاری ذرائع کا کہنا ہے کہ بلدیاتی انتخابات میں پی ٹی آئی کی شکست پر وزیر اعلیٰ محمود خان نے تحقیقات کرانے کا فیصلہ کیا ہے۔ذرائع کا کہنا ہے کہ بلدیاتی انتخابات میں پی ٹی آئی کی شکست کی وجوہات کی تحقیقات کرائی جائیں گی، پارٹی ڈسپلن کی خلاف ورزی کرنے والوں کے خلاف کارروائی کی جائے گی،اس سلسلے میں وزیراعلیٰ محمود خان جلد وزیر اعظم عمران خان سے ملاقات کریں گے۔بلدیاتی انتخابات میں پی ٹی آئی صوبے میں مئیر شپ کی ایک نشست بھی نہیں جیت سکی ہے۔معاون خصوصی اطلاعات خیبرپختونخوا بیرسٹر محمد علی سیف نے جیو نیوز سے بات چیت کرتے ہوئے بتایا کہ پارٹی بلدیاتی انتخابات کے معاملے کو سنجیدگی سے لے رہی ہے، وجوہات کا جائزہ لیا جائے گا کسی کے بارے میں ثبوت ملے تو کارروائی ہوگی۔بیرسٹر سیف نے کہا کہ بلدیاتی انتخابات میں پی ٹی آئی کی کارکردگی اتنی بری نہیں ہے، بعض اضلاع میں پارٹی امیدوار کے آزاد حیثیت میں کھڑے ہونے سے نقصان ہوا۔انہوں نے مزید کہا کہ پی ٹی آئی کے امیدواروں نے چیئرمین تحصیل کونسلز کی نشستیں جیتی ہیں، بونیر سمیت مختلف اضلاع میں پارٹی امیدواروں نے بہترین کارکردگی کا مظاہرہ کیا ہے۔