کراچی (نیشنل ٹائمز)پی آئی اے نے نجف عراق کی باقاعدہ سروس کا آغاز کردیا ،پی آئی اے کی پہلی شیڈول پرواز پی کے 219، 91 مسافروں کو لے کر نجف پہنچ گئی۔پرواز کے ساتھ عراقی سفیر حامد عباس لفتہ اور سی ای او پی آئی اے ائیر مارشل ارشد ملک بھی نجف پہنچے ۔ کراچی ایئر پورٹ پر ایک سادہ سی تقریب میں سی سی او پی آئی اے، وفاقی سفیر،جید علما اور مسافروں نے مل کر کیک کاٹا ۔دوران پرواز زائرین جوش و ولولے سے بھرپور نوحہ سراں رہے ۔نجف ائیرپورٹ پر گورنر نجف، پاکستانی سفیر، عراقی سول ایوی ایشنکے سربراہ اور مذہبی رہنمائوں نے استقبال کیا۔اس موقع پر سی ای او پی آئی اے ایئر مارشل ارشدملک نے کہاکہ پاکستان سے محبت اور سلامتی کا پیغام لے کر آئے ہیں۔عراق پاکستانی مسلمانوں کیلئے اہم منزل ہے اور تمام فقہائے کرام کے پیروکاروں کیلئے مقدس ہے۔اس موقع پر گورنر نجف نے کہاکہ پی آئی اے اور پاکستانی زائرین کی خدمت میں کوئی کسر نہیں چھوڑیں گے۔انہوں نے کہاکہ کوشش ہے ویزا نظام کو اور آسان بنایا جائے تاکہ زیادہ سے زیادہ لوگ زیارات سے مستفید ہو سکیں ۔عراق میں تعینات پاکستانی سفیراحمدامجدعلی نے کہاکہ پی آئی اے کی شیڈول پروازیں دونوں ممالک کے مابین تعلقات کو مزید مضبوط کریں گے ۔اب کوشش ہوگی کہ نجف کے بعد پی آئی اے بغداد کے روٹ کو بھی جلد شروع کرے ۔وفد نے استقبالیہ کے بعد مسجد کوفہ اور حضرت علیؓ کے روضہ کی زیارت بھی کی بعدازاں وفد اسی پرواز کے ذریعے وطن واپس پہنچ گیا۔