اسلام آباد(نیشنل ٹائمز) فرانس نے پاکستان میں اپنے سفیر کی تقرری مصر میں کردی ہے۔ جب کہ پاکستان میں نیا سفیر آئندہ برس عہدہ سنبھالے گا۔ تفصیلات کے مطابق، فرانس نے پاکستان میں اپنے سفیر مارک بیریٹی کی تقرری مصر میں کردی ہے، جہاں وہ قاہرہ میں اپنی ذمہ داریاں گزشتہ ماہ سے سنبھال رہے ہیں، وہ تین سال تک پاکستان میں سفیر رہے۔ روزنامہ جنگ میں شائع صالح ظافرکی رپورٹ کے مطابق انہیں گزشتہ برس پاکستان میں اس وقت توسیع دی گئی تھی جب کالعدم ٹی ایل پی نے فرانس کے خلاف احتجاج شروع کیے تھے اور انکی پاکستان سے بےدخلی کا مطالبہ کیا تھا۔ وہ پاکستان کے علاوہ مشرق وسطیٰ اور افریقا میں بھی سفارتی فرائض انجام دے چکے ہیں۔ جب کہ عربی، فرانسیسی اور انگریزی زبان جانتے ہیں۔ دریں اثنا سفارتی ذرائع کا کہناہے کہ پاکستان میں نئے فرانسیسی سفیر کی تقرری رواں ماہ ہوئی تھی تاہم وہ اسلام آباد نہیں آئے۔ ممکنہ طور پر نئے فرانسیسی سفیر آئندہ برس پاکستان آئیں گے۔ سیکرٹری خارجہ سہیل محمود اور ترجمان عاصم افتخار سے جب رابطے کی کوشش کی گئی تو ان سے رابطہ نا ہوسکا۔ دلچسپ بات یہ ہے کہ پیرس میں گزشتہ برس پاکستان کے سفیر معین الحق کے چین میں تبادلے کے بعد سے اب تک کسی سفیر کی فرانس میں تقرری نہیں کی گئی ہے۔