اسلام آباد(نیشنل ٹائمز)سابق وزیرِداخلہ رحمان ملک کا کہنا ہے کہ سانحہ کارساز کا درد ہمارے سینوں میں ہمیشہ زندہ رہے گا۔تفصیلات کے مطابق سابق وزیرِداخلہ رحمان ملک نے شہدائے کارساز کو خراج عقیدت پیش کرتے ہوئے کہا کہ سانحہ کارساز کے بہادر شہیدوں اور انکے اہل و عیال کو سلام پیش کرتا ہوں۔رحمان ملک نے کہا ہے کہ 18 اکتوبر پاکستانی تاریخ کا ایک پر درد و ناقابل فراموش دن ہے، سانحہ کارساز کا درد ہمارے سینوں میں ہمیشہ زندہ رہے گا۔سابق وزیرِداخلہ کا کہنا ہے کہ کارساز میں ساتھیوں کے گرے ہوئے پامال لاشوں کا پرآشوب منظر آج بھی آنکھوں کے سامنے ہے، ظلم، ستم اور گری ہوئی لاشیں محترمہ بینظیر بھٹو شہید و بہادر جیالوں کے حوصلے پست نہیں کر سکا۔انہوں نے کہا کہ زندگی کو لاحق خطرات، دھمکیاں اور بم دھماکے شہید محترمہ بینظیر بھٹو کو اپنے کارکنوں سے دور نہ کر سکے، زندگی کی آخری لمحے تک محترمہ بینظیر بھٹو اپنے کارکنان کے درمیان رہیں، ملکی سالمیت اور جمہوریت کے استحکام کیلئے پی پی پی کی قربانی بے مثل و بینظیر ہیں۔رحمان ملک نے کہا کہ دہشتگردی نے پاکستان کو ناقابل تالافی نقصان پہنچایا ہے، آج کے دن ملک و انسانیت کے دشمن طالبان و ظالمان نے پاک سرزمین کو خون میں نہلایا تھا۔سابق وزیرِ داخلہ رحمان ملک نے مزید کہا کہ شہدائے کے خاندانوں کی ویلفیئر کے لئے ایک ٹرسٹ کا اعلان کیا جائے، ٹرسٹ حکومت سندھ کی ہاؤسنگ اسکیموں سے شہداء کے خاندانوں کو مکانات فراہم کرے۔