کراچی(نیشنل ٹائمز)دارالعلوم انوارمصطفیٰ مہران ٹائون کورنگی کے زیراہتمام تیسویں سالانہ مرکزی میلادمصطفیٰﷺ ریلی ہر سال کی طرح جوش وجذبے کے تحت جماعت اہلسنّت پاکستان کراچی کی لاء اینڈآرڈرومساجد کمیٹی کے سربراہ مفتی محمدبلال قادری،علامہ محمد معراج اخترالقادری،مولانا غلام محی الدین اخترالقادری، مولانا سلیم نقشبندی، مولانامحمدیامین رضوی، مولاناعبدالحفیظ قادری، مولاناریاض حسین نقشبندی، مولاناظہور ،مفتی فرقان شامی،علامہ فیضان نقشبندی ،قاری شریف قادری ،مولاناراشدسعیدی ودیگر علماء ومشائخ کی قیادت میں جامع مسجد مریم سے نکالی گئی۔ ریلی مہران ٹائون کے مختلف علاقوں سے ہوتی ہوئی واپس دارالعلوم انوارمصطفیٰ پر اختتام پذیر ہوئی۔ریلی کے شرکاء سے خطاب کرتے ہوئے مقررین نے اس عزم کا اعادہ کیاکہ حضوراکرم ﷺکی دنیامیں تشریف آوری کاجشن بھرپوراور شایان شان طریقے سے مناتے رہیں گے، جشن عید میلادالنبی ﷺمنانے میں کوئی رکاوٹ اور رخنہ اندازی برداشت نہیں کریں گے۔مفتی محمدبلال قادری نے اپنے خطاب میں کہاکہ نبی اکرم ﷺ کی ولادت سے دنیامیں نورکی روشنی پھیل گئی اور کفر کے اندھیرے چھٹ گئے،حضورﷺ حق کاپرچم لے کر تشریف لائے اور باطل کو ہمیشہ کے لئے مٹادیا۔آپ ﷺ پیغمبر انقلاب بن کر دنیامیں تشریف لائے،آپ ﷺ کے سبب انسانیت کو معراج ملی ۔انہوں نے کہاکہ نبی پاک ﷺ کا اسوہء حسنہ رہتی دنیاتک کے لئے مشعل راہ ہے، اگر دنیامیں امن قائم کرناہے تو حضوراکرم ﷺ کے لائے ہوئے دین کے اصولوں پر عمل کیاجائے۔ شرکاء نے مطالبہ کیاکہ ملک میں فوری طورپر نظام مصطفیٰ ﷺ نافذ کیاجائے۔ انہوں نے کہاکہ نظام مصطفیٰﷺ ہی ملک کودرپیش تمام مسائل اور چیلنجز کا حل موجودہے۔