اسلام آباد(نیشنل ٹائمز)سابق صدر پاکستان آصف علی زرداری اور چیئرمین پاکستان پیپلزپارٹی بلاول بھٹو زرداری نے پیپلزپارٹی راولپنڈی کے رہنما رشید میر کے انتقال پر گہر رنج و غم اور صدمے کا اظہار کیا ہے۔ اپنے الگ الگ تعزیتی پیغامات میں پیپلزپارٹی پارلیمنٹیرینز کے صدر آصف علی زرداری اور چیئرمین پاکستان پیپلزپارٹی بلاول بھٹو زرداری نے مرحوم رشید میر کو خراج عقیدت پیش کرتے ہوئے کہا ہے کہ رشید میر کا شمار پارٹی کے بانی کارکنان میں ہے اور وہ زندگی بھر ثابت قدم اور پارٹی کے وفادار رہے۔ رشید میر نے دورہ آمریت میں قید اور تشدد برداشت کیا مگر اپنے اصولوں پرکوئی سودابازی نہیں کی۔ سابق صدر آصف علی زرداری اور چیئرمین پی پی پی نے کہا کہ رشید میر پارٹی کا انمول سرمایہ تھے۔ ان کی خدمات ناقابل فراموش ہیں۔رشید میر کے انتقال پر قیادت اور کارکن سوگوار ہیں۔ آصف علی زرداری اور بلاول بھٹو زرداری نے مرحوم رشید میر کے خاندان سے تعزیت کا اظہار کرتے ہوئے مرحوم کی مغفرت اور بلند درجات کے لئے دعا کی۔