اسلام آباد(نیشنل ٹائمز) پاکستان پیپلزپارٹی کے مرکزی سیکریٹری اطلاعات فیصل کریم کنڈی نے عمران خان کی طرف سے گورننس کی باتوں کو منافقت کی انتہا قرار دیا ہے۔ انہوں نے کہا کہ حد یہ ہے کہ سابق صدر اور سابق وزیراعظم کے خلاف توشہ خانہ ریفرنس بھیجا جاتا ہے جبکہ عمران خان مختلف ممالک کی طرف سے دئیے گئے تحائف کو خفیہ رکھا ہوا ہے۔ انہوں نے کہا کہ اپنے مخالفین کے خلاف نیب کا وحشیانہ استعمال کرنے والے شخص نے گندم اور چینی کا بحران پیدا کرکے قوم کو دنوں ہاتھوں سے لوٹنے والوں کو تحفظ فراہم کیا۔ ایل این جی مہنگی خرید کرکے تقریباً چھ سو ارب روپے کا ڈاکہ مارنے والے کو پناہ دی کیونکہ ندیم بابر اور تابش گوہر ان کی اے ٹی ایم مشینیں ہیں۔ فیصل کریم کنڈی نے کہاکہ کرپشن کی کہانی عمران خان سے شروع ہوکر ایک بڑی داستان بن کر عمران خان پر ہی ختم ہوتی ہے۔ عمران خان ایسی بڑی بیماری ہے جو صدقے کے کی رقم کو بھی ہضم کر جاتے ہیں۔ دولت کی خاطر خان صاحب پی سی بی کو ٹھوکر مار کر کیری پیکر کی ٹیم میں شامل ہوئے تھے۔ فیصل کریم کنڈی نے کہا کہ خان صاحب تم نے جو ملک کا حشر کیا ہے قوم تمہیں کبھی نہیں بھولے گی۔