کراچی(نیشنل ٹائمز)کراچی کے علاقے سعدی ٹاؤن میں پولیس اور حساس اداروں نے چھاپے کے دوران سابق ایس ایچ او سچل انسپکٹر ہارون کورائی کو حراست میں لے لیا ہے۔ تفصیلات کے مطابق سابق ایس ایچ او سچل انسپکٹر ہارون کورائی کو ڈرائیور سمیت حراست میں لیا گیا ہے۔ذرائع نے بتایا ہے کہ سابق ایس ایچ او سچل انسپکٹر ہارون کورائی کوہائشی پراجیکٹ سعدی ٹاؤن کے داخلی دروازے سے حراست میں لیا گیا ہے۔اس ضمن میں پولیس حکام کا کہنا ہے کہ ون فائیو مددگار پولیس کو سابق ایس ایچ او سچل انسپکٹر ہارون کورائی کے بیٹے عامر نے کال کرکے اطلاع دی تھی۔پولیس حکام نے کہا ہے کہ پولیس کے اعلی افسران نے انسپکٹر ہارون کورائی کو چند روز قبل ایس ایچ او سچل کے عہدے سے معطل کیا تھا، سابق ایس ایچ او انسپکٹر ہارون کورائی کیخلاف محکمہ جاتی انکوائری میں انہیں ملوث پائے جانے کی بنا پر معطل کیا گیا تھا، چھاپے کے حوالے سے کسی بھی تحقیقاتی ادارے نے متعلقہ تھانے کی پولیس سے رابطہ نہیں کیا تھا، ون فائیو کی اطلاع پر پولیس افسر کے مبینہ اغوإ کے حوالے سے تحقیقات شروع کردی ہیں۔دوسری جانب سابق ایس ایچ او سچل انسپکٹر ہارون کورائی کے بیٹے عامر نے بتایا ہے کہ چھاپے کےدوران تین پولیس موبائلز اور پرائیویٹ گاڑیوں میں سادہ لباس افراد کے ہمراہ موجود تھیں، سادہ لباس افراد میرے والد ہارون کورائی کو منہ پر کپڑا ڈال کر ڈرائیور اختر سمیت ہمراہ لے گئے ہیں۔