اسلام آباد(نیشنل ٹائمز)مرکزی اطلاعات سیکریٹری پاکستان پیپلز پارٹی پارلیمنٹیرینز و رکن قومی اسمبلی شازیہ مری نے کہا کہ حکومت اپنی ناقص کارکردگی کو چھپانے کیلئے الیکشن کمیشن پر حملے کر رہی ہے اور نالائق وزیر اعظم نے ملک کو تختہ مشق بنا دیا ہے۔ شازیہ مری نے کہا کہ چین کی طرف سے قومی راہداری کے حوالے سے شکایات تشویشناک ہیں ان باتوں کا اظہار آج انہوں نے اپنے ایک جاری کردہ بیان میں کیا ہے۔ پاکستان پیپلز پارٹی پارلیمنٹیرینز کی مرکزی اطلاعات سیکریٹری شازیہ مری نے کہا کہ نیوزی لینڈ کرکٹ ٹیم کے دورہ پاکستان کے انکار کے بعد انگلینڈ کرکٹ ٹیم کا فیصلہ ملک کے لیئے بہت بڑا دھچکہ ہے، اب تو پی ٹی آئی حکومت کے خود کے اپنے ایم این ایز بھی وزیراعظم کی نالائقی سے بیزار ہو چکے ہیں۔ شازیہ مری نے کہا کہ پاکستان میڈیا ڈویلپمینٹ اتھارٹی ( پی ایم ڈی اے) کی طرح الیکٹرانک ووٹنگ مشین (ای وی ایم )بھی بدنیتی پر مبنی ہے ۔