اسلام آباد(نیشنل ٹائمز)وزیر خارجہ مخدوم شاہ محمود قریشی نے شنگھائی تعاون تنظیم کی وزرائے خارجہ کونسل میں شریک دیگر وزرائے خارجہ کے ہمراہ بدھ کو تاجکستان کے صدر امام علی رحمان سے ملاقات کی۔دفتر خارجہ کے مطابق وزیر خارجہ نے کہا کہ پاکستان اور تاجکستان میں تاریخی برادرانہ تعلقات ہیں،تاجکستان کے ساتھ دو طرفہ تعلقات کو مزید مستحکم بنانے کے لیے پر عزم ہیں۔تاجکستان کے ساتھ، تعلیم، ہاؤسنگ، انفراسٹرکچر ، ٹیکنالوجی اور توانائی کے شعبوں میں تعاون کے فروغ کیلئے پر عزم ہیں۔شاہ محمود قریشی نے کہا کہ کاسا منصوبوں کی بروقت تکمیل، توانائی راہداری کے قیام میں مددگار ثابت ہوگا۔وزیر خارجہ نے وسطی ایشیائی جمہوریہ کے ساتھ ریل ، سڑک اور توانائی کے منصوبوں پر عملدرآمد کے لئے پاکستان کی دلچسپی کااعادہ کیا۔ وزیر خارجہ نے مزید کہا کہ سی پیک اس سلسلے میں ایک مثالی موقع فراہم کرتا ہے۔علاقائی سلامتی کی صورتحال پر ، وزیر خارجہ نے اس بات پر زور دیا کہ افغانستان سے بین الاقوامی افواج کے انخلا سے نئے چیلنجز اور مواقع سامنے آ گئے ہیں۔ انہوں نے اس امید کا اظہار کیا کہ شنگھائی تعاون تنظیم افغانستان میں امن اور مفاہمت کے عمل میں مدد کے لئے بھر پور کردار ادا کرتا رہے گا۔وزیر خارجہ نے تاجک صدر کو افغانستان میں قیام امن کیلئے پاکستان کی مصالحانہ کوششوں سے آگاہ کیا۔وزیر خارجہ نے تاجک صدر کو صدر پاکستان ڈاکٹر عارف علوی اور وزیر اعظم عمران خان اور پاکستانی عوام کی جانب سے نیک خواہشات کا پیغام پہنچایا۔