اسلام آباد (نیشنل ٹائمز) وفاقی دارالحکومت اسلام آباد میں مارگلہ ہلز پر لگنے والی آگ پر قابو پا لیا گیا، آپریشن میں 200 سے زائد فائر فائٹرز اور پاک فوج کے ہیلی کاپٹرز نے بھی معاونت کی جبکہ وزیراعظم شہباز شریف کی جانب سے متعلقہ اداروں اور افسران کو شاباش دی گئی۔نیشنل ڈیزاسٹر مینجمنٹ اتھارٹی(این ڈی ایم اے)کے ترجمان نے بتایا کہ ہم نے مارگلہ ہلز پر لگنے والی آگ پر قابو پانے کے لئے ہیلی کاپٹرز مہیا کرائے۔ترجمان کے مطابق آگ 4 مختلف مقامات پر لگی ہوئی تھی، زمینی رابطہ نہ ہونے کے باعث آگ بجھانے میں مشکلات کا سامنا کرنا پڑا۔انہوں نے بتایا کہ ایوی ایشن سکوارڈن اور پاک فوج کے ہیلی کاپٹرز نے آگ بجھانے میں معاونت کی۔ترجمان کے مطابق اندھیرا ہونے تک ہیلی آپریشن جاری رہا جس کی مدد سے آگ پر قابو پالیا گیا۔