مظفرآباد(نیشنل ٹائمز)پی پی رہنما، صوبائی وزیر برائے تعلیم سندھ سعید غنی کا کہنا ہے کہ آزاد کشمیر میں پاکستان تحریک انصاف (پی ٹی آئی) کی پوزیشن کمزور ہے۔سعید غنی نے چوہدری لطیف اکبر کے ہمراہ پریس کانفرنس کے دوران کہا ہے کہ آزاد کشمیر کا آئین بڑا واضح ہے، انتخابات آگے نہیں کیے جاسکتے، پی ٹی آئی اور این سی او سی آزاد کشمیر کے انتخابات آگے لے جانا چاہتے ہیں، آزاد کشمیر کے آئین کے مطابق اسمبلی کی مدت ختم ہونے سے 60 دن پہلے انتخابات کرائے جائیں۔سعید غنی نے کہا ہے کہ کچھ لوگوں کو دباؤ میں لاکر وفاداریاں تبدیل کرائی گئیں، کوویڈ19 کے حالات میں این اے 249 میں انتخابات آگے کرانے کی مخالفت کی گئی۔انہوں نے مزید کہا کہ آزادکشمیر اسمبلی کی مدت 29 جولائی ہے، اس کے دو ماہ میں انتخابات کروانا ضروری ہے، پی ٹی آئی میں زبردستی لوگوں کو شامل کیا جا رہا ہے، نیب سے خوفزدہ کروا کر مزید لوگوں کو شامل کرایا جارہا ہے۔سعید غنی کا کہنا تھا کہ پاکستان میں تمام ضمنی انتخابات اپنے طے شدہ وقت پر ہوئے، آزاد کشمیر میں انتخابات لیٹ کروانا بھاگنے کی کوشش ہے۔دوسری جانب پی پی رہنما چوہدری لطیف اکبر کا کہنا تھا کہ آزاد کشمیر میں انتخابات ملتوی نہیں کیے جا سکتے، آزاد کشمیر میں شکست پی ٹی آئی کا مقدر بن چکی ہے۔چوہدری لطیف اکبر نے کہا کہ الیکشن کمیشن کے پاس انتخابات ملتوی کرنے کا اختیار نہیں ہے۔