کینبرا(نیشنل ٹایمز)آسٹریلیا نے افغانستان کے دارالحکومت کابل میں اپنا سفارتخانہ بند کرنے کافیصلہ کیاہے جہاں آسٹریلوی دستوں کا رواں سال کے آخر میں انخلاء طے ہے۔منگل کے روز مشترکہ میڈیا بیان کے مطابق آسٹریلوی وزیراعظم سکاٹ موریسن اور وزیرخارجہ ماریس پائن نے کہاکہ سفارتخانے کی عمارت28مئی کو بند کردی جائے گی۔انہوں نے کہاکہ افغانستان میں ہماری رہائشی موجودگی اورکابل میں آسٹریلوی سفارتخانہ اس وقت بندکردیاجائے گا۔بیان کے مطا بق آسٹریلیاکوتوقع ہے کہ یہ اقدام عارضی ہوگااورجیسے ہی حالات اجازت دیں گے ہم کابل میں اپنی مستقل موجودگی بحال کردیں گے۔بیان میں مزید کہاگیا ہے کہ بین الاقوامی فورسزاورآسٹریلوی فورسزکے اگلے چند ماہ میں افغانستان سے انخلاء کے باعث غیریقینی کا بڑھتا ہوا ماحول پیداہوگیاہے جہاں حکومت کو مشورہ دیا گیا ہے کہ ہماری جاری سفارتی موجودگی کی مدد کیلئے سکیورٹی کے انتظامات فراہم نہیں کئے جا سکتے۔موریسن نے اپریل میں اعلان کیا تھا کہ آسٹریلوی دستے رواں سال ستمبر میں افغانستان سے انخلاء کریں گے۔آسٹریلوی نشریاتی کارپوریشن(اے بی سی) کے مطابق سفارتخانہ 2006 سے فعال ہے۔