اسلام آباد (نیشنل ٹائمز)وزیر اعظم کی معاون خصوصی برائے تخفیف غربت وسماجی تحفظ ڈاکٹر ثانیہ نشتر نے منگل کو اسلام آباد کے نواحی علاقوں میں” احساس کوئی بھوکا نہ سوئے “کے پروگرام کے تحت افطار کی تقسیم کے آپریشن کا جائزہ لیا۔ اس موقع پرڈاکٹر نشتر نے ”احساس کوئی بھوکا نہ سوئے“ کے تحت متعارف کرائے گئے فوڈ ٹرک کے ذریعے خوراک کی تقسیم کے انتظامات دیکھے۔انہوں نے موقع پر موجود لوگوں سے کہا کہ افطار کا کھانا لیتے وقت کوویڈ۔19 سے بچاؤکی احتیاطی تدابیر اختیار کریں تاکہ وہ خود بھی وبا سے محفوظ رہیں اور دوسرے بھی محفوظ رہ سکیں۔ ڈاکٹر ثانیہ نشتر نے دیہاڑی دار مزدور مرد و خواتین کے ساتھ گفتگو بھی کی اور ان کے مسائل سنے۔انہوں نے کہا کہ رمضان کے مہینے میں لنگر اسکیم ، پناہ گاہ اور احساس ٹرکوں کے ذریعے مستحق افراد کو سحر اور افطار کھانا تقسیم کرنے کے خصوصی انتظامات کئے گئے تاکہ مستحق افراد بھی ماہ صیام کے فضائل و برکات سمیٹ سکیں۔