واشنگٹن(رپورٹرزڈیسک)امریکہ کے مشیر برائے قومی سلامتی جیک سلیوان نے بیت المقدس کی صورتحال پر اپنے اسرائیلی ہم منصب سے شدید تحفظات کا اظہار کیا ہے۔وائٹ ہائوس نے ایک بیان میں کہا کہ اسرائیلی مشیر قومی سلامتی مائر بن شبات کے ساتھ فون پر گفتگو کے دوران جیک سلیوان نے امریکہ کی جانب سے الشیخ جراح کے علاقے میں فلسطینی خاندانوں کے گھروں سے ممکنہ انخلا پر شدید تحفظات کا بھی اظہار کیا ہے۔مشرقی بیت المقدس اور دیگر فلسطینی علاقوں میں گزشتہ کچھ دنوں کے دوران اسرائیلی سیکورٹی فورسز کے ساتھ جھڑپوں کے دوران سینکڑوں فلسطینی شہری زخمی ہو چکے ہیں۔یہ جھڑپیں رمضان المبارک کے دوران مشرقی بیت المقدس میں فلسطینی مسلمانوں پر اسرائیلی پابندیوں اور مشرقی بیت المقدس کے ایک محلے سے کچھ فلسطینی خاندانوں کو بے دخل کرنے کے منصوبے کی وجہ سے شروع ہوئی ہیں۔اسرائیل نے 1967 کی مشرق وسطی جنگ میں مغربی کنارے ، مشرقی بیت المقدس اور غزہ کی پٹی پر قبضہ کیا تھا۔ اس نے جنگ کے فورا بعد ہی مشرقی بیت المقدس کو اسرائیلی دارالحکومت کا حصہ قرار دیتے ہوئے اپنے ساتھ منسلک کر لیا تھا۔