ٹوکیو(نیوز ڈیسک) : جاپان میں سائنسی ماہرین ایسی پلاسٹک بنانے کے کیلئے کوشاں ہیں جس کے اثرات ماحول پر اثر انداز نہ ہوں، اس مقصد کیلئے ایک یونیورسٹی سے معاہدہ کیا گیا ہے۔تفصیلات کے مطابق جاپانی کمپنیوں نے زیادہ مقدار میں ماحول دوست پلاسٹک تیار کرنے کیلئے ایک سرِفہرست یونیورسٹی سے اشتراک عمل کا معاہدہ کیا ہے۔غیر ملکی خبر رساں ادارے کے مطابق جاپانی کمپنیاں نئی قسم کا ایسا پلاسٹک تیار کرنے کی غرض سے ایک سرِ فہرست یونیورسٹی سے اشتراک کر رہی ہیں جو کاربن ڈائی آکسائیڈ کا اخراج کم کرنے میں مدد دے سکے۔اس گروپ کا ارادہ یہ ہے کہ بائیو ماس کے نام سے معروف نامیاتی مواد سے بڑے پیمانے پر پلاسٹک بنانے کیلئے ٹیکنالوجی تیار کی جائے، مذکورہ کلیدی مواد، مائیکرو ایلگے یُوگلینا سے آتا ہے۔اس مقصد کیلئے سیئکو اپسن، این ای سی، یونیورسٹی آف ٹوکیو اور یُوگلینا نام کی ایک نئی کمپنی کے مابین ایک کنسورشیم تشکیل دیا گیا ہے۔ بائیو پلاسٹک پیرامائلون نامی مواد سے بنایا جائے گا جو یُوگلینا سے حاصل کیا جاتا ہے۔محقیقین کے مطابق یُوگلینا، ضیائی تالیف کے ذریعے کاربن ڈائی آکسائیڈ کو جذب کر لیتا ہے, ان کا خیال ہے کہ یہ عام پلاسٹک کی نسبت کہیں زیادہ ماحول دوست متبادل ہو سکتا ہے جو معدنی ایندھن سے حاصل کیا جاتا ہے۔اس کے پیداواری عمل کے دوران بڑی مقدار میں کاربن ڈائی آکسائیڈ خارج ہوتی ہے۔ ذرائع کا کہنا ہے کہ یہ کنسورشیم 2030ء تک سالانہ تقریباً دو لاکھ ٹن بائیوماس ماحول دوست پلاسٹک تیار کرنےکیلئے پرامید ہے۔