واشنگٹن(شِنہوا)امریکہ کے جنوبی علاقوں میں آنیوالے شدید طوفانوں اور بگولوں کے باعث کم از کم 6 افراد ہلاک ہو گئے ہیں۔سی این این کی ایک رپورٹ میں کہا گیا ہے کہ جمعہ کی شام الابامہ کی کاؤنٹی کالہون سے گزرنے والے ایک بگولے کے باعث کم از کم 5 اموات اور متعدد افراد کے زخمی ہونے کی اطلاعات ملی ہیں ، املاک اور گھروں کو بھی کافی نقصان پہنچا ہے۔یوٹیلیٹی ٹریکر پاورآوٹیج ڈاٹ یو ایس کے مطابق ہفتہ کی صبح تک الابامہ اور جارجیا میں تقریباً 38 ہزار گھروں اور کاروباروں کو بجلی کی سپلائی منقطع تھی۔ہفتہ کے روز علی الصبح ایک بگولہ جارجیا کے مغربی شہر نیونن سے ٹکرایا ہے ، موسمیات سروس نے بتایا کہ نصف شب کے بعد آنیوالے بگولے نے چھتوں ، درختوں اور بجلی کے کھمبوں کو اکھاڑ پھینکا۔فائر چیف ڈیرون پیٹرک ولسن نے بتایا کہ نیونن کی کووئٹا کاؤنٹی میں طوفان کے باعث کم از کم 1 شخص ہلاک ہو گیا ہے۔موسمیات سروس نے بتایا کہ مجموعی طور پر بگولوں کی 23 اطلاعات موصول ہوئی ہیں ، جن میں مسیسپی سے 1 ، الابامہ سے 17 اور جارجیا سے 5 اطلاعات ملی ہیں۔