لاہور(نیشنل ٹائمز) مسلم لیگ ن کے رکن صوبائی اسمبلی غیاث الدین کی سرکاری گاڑی چوری ہو گئی۔ ویب سائٹ ’پرو پاکستانی‘ کے مطابق غیاث الدین کو حکومت کی طرف سے ملنے والی گاڑی لاہور کے علاقہ سبزہ زار میں ان کے داماد کے گھر کے باہر سے چوری ہوئی۔ حکام کے مطابق یہ گاڑی ڈپٹی کمشنر آفس گوجرانوالہ کے ٹائٹل کے تحت رجسٹرڈ تھی اور وزیراعلیٰ ہاؤس کی طرف سے غیاث الدین کو آفیشل استعمال کے لیے دی گئی تھی۔ ایم پی اے کے داماد مبارک علی کی طرف سے تھانہ نواں کوٹ میں گاڑی چوری ہونے کی ایف آئی آر درج کروائی گئی ہے۔ حکام کا کہنا ہے کہ گاڑی کی برآمدگی کے لیے سرتوڑ کوششیں کی جا رہی ہیں اور ملزمان کو جلد قانون کے کٹہرے میں لا کھڑا کیا جائے گا۔